Usı jıl 24-aprel kúni Ózbekstan Sawda-sanaat palatası Qaraqalpaqstan Respublikası basqarmasında «Saqawat hám qayırqomlıq» atamasında gezektegi qayırqomlıq aukcionı shólkemlestirildi.

Aukciondı shólkemlestiriwden tiykarǵı maqset – Nókis qalasındaǵı «Múriwbet» mektep-internatınıń tárbiyalanıwshıları bolǵan imkaniyatı sheklengen hayal-qızlardı qollap-quwatlawdan ibarat.
Onda basqarma basshıları hám qánigeleri, mákeme hám shólkem wákilleri, sonday-aq 20 dan aslam isbilermenlik subektleri qatnastı.
Aukcion sheńberinde «Múriwbet» úy-internatı tárbiyalanıwshıları tárepinen islengen ónermentshilik buyımları, toqımashılıq hám tigiwshilik ónimleri, plastikalıq buyımlardan islengen kompoziciyaları sıyaqlı 50 ge shamalas qol miynetleri aukcionǵa qoyıldı.
Dáslepki satıwǵa qoyılǵan quwırshaqtıń bahası 100 mıń sumǵa shekem kóterildi. «Múriwbet» úy-internatı tárbiyalanıwshıları tárepinen tayarlanǵan basqa ónimler de joqarı bahalandı.
Qayırqomlıq ilajda belsendilik kórsetkeni ushın isbilermenlerge minnetdarshılıq bildirilip, sebep penen olar óz-ara sáwbetlesiw, pikir alısıw imkaniyatına iye boldı.
Aukcionnan jıynalǵan qarjılar tolıǵı menen “Múriwbet” úy-internatınıń esap-betine ótkerilip berildi.

Á.Jiyemuratov,
Qaraqalpaqstan xabar agentligi.