Beruniy rayonında qálbeki akciz markaları menen qadaqlanǵan, jasalma usılda tayarlanǵan alkogol ónimlerin islep shıǵarıp atırǵan “jasırın cex”tıń jumıslarına shek qoyıldı.

Qaraqalpaqstan Respublikası Bajıxana basqarmasınıń Kontrabandaǵa qarsı gúresiw bólimi xızmetkerleri tárepinen MQX, IIM, MG hám “Nókis vino zavodı” AJ juwapkerleri menen birgelikte Beruniy rayonında ótkerilgen operativ ilaj dawamında, rayondaǵı úylerdiń birinde alkogol ónimlerin qoldan tayarlawǵa mólsherlengen “Jasırın cex” shólkemlestirilgenligi anıqlandı.
Shańaraqtan 0,45 litr sıyımlılıqtaǵı 480 dana, 0,75 litr sıyımlılıqtaǵı 36 dana, ulıwma esapta 243 litr qálbeki akciz markalar menen qadaqlanǵan, sapası kepillenbegen alkogol ónimleri, 340 litr etil spirti, 55 litrlik plastmassa ıdıs, 3 metrlik rezina shlang, 43 dana bos shiyshe ayǵaqlı dálil sıpatında alındı.
Kvartira iyesine bajıxana uyımları tárepinen Ózbekstan Respublikası Jınayat kodeksiniń tiyisli statyalarına muwapıq jınayat isi qozǵatıldı.

Qaraqalpaqstan xabar agentligi