Qaraqalpaqstan Respublikası Ministrler Keńesi, tiyisli ministrlikler menen uyımlar tárepinen joqarı bilimlendiriw oqıw orınlarındaǵı student-jaslar arasında shólkemlestirilgen «Studentler báhári» festivalı kóterińkilik ruwxta bolıp ótti.

Hár jılı ótkeriliwi dástúrge aylanǵan bul festivaldı ótkeriwden baslı maqset – student-jaslardıń dúnyaǵa ruwxıy-ideologiyalıq kózqarasın qáliplestiriw, bilimlendiriw mákemelerinde ruwxıy-aǵartıwshılıq jumıslardıń nátiyjeliligin arttırıw, olardıń bos waqıtların mazmunlı ótkeriwin shólkemlestiriw hám talantın júzege shıǵarıw bolıp esaplanadı.
Festival sheńberindegi ilajlar Qaraqalpaqstan awıl xojalıǵı hám agrotexnologiyalar institutında da ótkerilip, ilaj fakultetler arasında bolıp ótken “Zákawat” intellektuallıq oyını menen baslandı. Institut fakultetlerinen dúzilgen komandalar aqıl jarısına túsip, Watan, milliy ideya, tariyx, qatnasıqlar, doslıq hám basqa da áhmiyetli temalarda berilgen sorawlarǵa belgilengen waqıt ishinde tez hám anıq juwap beriwge háreket etti. Jeńimpaz komandalar anıqlanıp, múnásip sıylıqlandı.
“Global money Week” xalıqaralıq tálim kompaniyası sheńberindegi ilajda studentler ushın finanslıq sawatlılıq boyınsha seminar-trening ótkerildi.
Ilajǵa Qaraqalpaq mámleketlik universitetiniń Finans kafedrasınıń assistenti A.Dáwletalieva, volontyor-studentleri A.Atamuratov, N.Jarılqapova, V.Maqsetbaeva, J.Najmaddinovlar student-jaslarǵa finanslıq sawatlılıqtı arttırıw boyınsha “Bank depozitlerinen qalay etip nátiyjeli paydalanıw múmkin” joybarı tuwralı túsinikler berdi.
Volontyorlar tayarlaǵan prezentaciyalarınıń járdeminde student-jaslarǵa keyingi waqıtta jiyi ushırasıp atırǵan kiberjınayatlar, bank depozitleri hám tutınıwshılardıń huqıqları haqqında mısallar arqalı maǵlıwmatlar berdi.
Professor-oqıtıwshılar, taraw qánigeleri hám usı baǵdarda bilim alıp atırǵan student-jaslar ózleriniń bilim hám tájiriybeleri menen ortaqlasıp, pikir alıstı.
Student-jaslar arasında “Huqıqbuzarlıq hám jinayatshılıqtıń aldın alıw” atamasında ótkerilgen ushırasıwda huqıq qorǵaw uyımları wákilleriniń bahalı másláhátleri tıńlandı.
Ilajda Jaslar menen islesiw, ruwxıylıq hám aǵartıwshılıq isleri boyınsha birinshi prorektor M.Dáwletmuratov, Jınayat isleri boyınsha Taqıyatas rayonı sudyası A.Davletov, institut profilaktika inspektorı T.Keńesbaev, dekan orınbasarları, tyutorlar hám student-jaslar qatnastı.
Mámleket qáwipsizligi hám huqıqbuzarlıqlardıń aldın alıwǵa qaratılǵan bul ruwxıy-aǵartıwshılıq ilajda 2025-jılı respublika máhállelerinde qáwipsiz ortalıqtı jaratıw, jaslar arasında huqıqbuzarlıqlar hám jınayatshılıqtıń erte aldın alıw boyınsha qabıl etilgen Ózbekstan Respublikası Prezidentiniń qararı (“Kóshpeli sud” hám “Jınayat dodalawları”) tuwralı keń túrde maǵlıwmatlar berildi.
Bul qararda belgilengen áhmiyetli wazıypalar, atap aytqanda, mámleketimizdegi huqıqıy mádeniyattı arttırıw hám jaslar arasında jınayatshılıqtıń aldın alıw boyınsha ámelge asırılıp atırǵan jańasha ilajlarǵa keńnen toqtap ótilip, pikir-usınıslar bildirildi. Jaslar qánigelerden ózlerin qızıqtırǵan sorawlarǵa juwap aldı.
Festival sheńberinde bul oqıw ornındaǵı student-jaslar arasında “Mini futbol” boyınsha da jarıs shólkemlestirildi.

Á.Jiyemuratov,
Qaraqalpaqstan xabar agentligi