Ózbekstan Respublikası Prezidenti Shavkat Mirziyoevtiń mirát etiwine bola Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov 23-24-aprel kúnleri sapar menen Samarqand qalasında boldı.

Ózbekstan Respublikası Prezidenti Shavkat Mirziyoev hám Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov tar sheńberde hám rásmiy delegaciyalardıń qatnasıwında sóylesiw ótkerdi.
Ushırasıw aldında Túrkmenstan jetekshisi mámleketimiz basshısına Túrkmenstan Prezidenti Serdar Berdimuhamedovtıń sálemi hám eń jaqsı tileklerin jetkerdi.
Ózbekstan menen Túrkmenstan arasındaǵı doslıq, jaqsı qońsıshılıq hám strategiyalıq sheriklik qatnasıqların jáne de rawajlandırıw hám bekkemlewdiń áhmiyetli máseleleri kórip shıǵıldı.
Kóp táreplemeli birge islesiw barlıq baǵdarlarda, sonıń ishinde siyasiy, parlamentleraralıq, sawda-ekonomikalıq, transport-kommunikaciya hám mádeniy-gumanitarlıq tarawlarda jedel rawajlanıp atırǵanı úlken qanaatlanıwshılıq penen atap ótildi.
Barlıq dárejelerde nátiyjeli sóylesiw alıp barılmaqta. Húkimetleraralıq komissiya májilisleri, Isbilermenler keńesi, Aymaqlar forumı, mádeniyat kúnleri, kórgizbeler hám basqa da ilajlar turaqlı ótkerip kelinbekte. Ótken jılı óz-ara tovar almasıw kólemi 1,1 milliard dollardı quradı. Paytaxtlarda sawda úyleri ashılıp, júk tasıw kólemi artpaqta. Jaqın jıllarda tovar almasıwdı 2 milliard dollarǵa jetkeriw maqset etilgen.
Energetika, transport, awıl hám suw xojalıǵı, ekonomikanıń basqa tarmaqlarında óz-ara paydalı kooperaciya rawajlanbaqta. Birgelikte «Shavat-Tashawız» shegara aldı sawda zonası shólkemlestirilmekte.
Jedel aymaqlararalıq sóylesiwler jolǵa qoyılǵan, mádeniy-gumanitarlıq almasıw boyınsha úlken baǵdarlamalar ámelge asırılmaqta.
Usı jılı Xiywa qalasında úshinshi Aymaqlar forumın hám Ózbekstanda Túrkmenstan mádeniyatı kúnlerin ótkeriwge kelisip alındı.
Ózbekstan hám Túrkmenstan jetekshileri regionallıq sheriklikke baylanıslı máseleler, sonıń ishinde «Oraylıq Aziya plyus» formatındaǵı bolajaq sammitler hám Tashkent qalasında ótkeriletuǵın Oraylıq Aziya mámleketleri basshılarınıń jetinshi Másláhát ushırasıwına tayarlıq kóriw boyınsha pikir alıstı.
Mámleketimiz basshısı Túrkmenstannıń baslaması menen Birlesken Milletler Shólkemi Bas Assambleyası tárepinen járiyalanǵan Xalıqaralıq tınıshlıq hám isenim jılı sheńberinde bıyıl dekabr ayında Ashxabad qalasında ótkeriletuǵın forum hám basqa da xalıqaralıq ilajlar úlken áhmiyetke iye ekenin ayrıqsha atap ótti.
Ushırasıwda Ózbekstan Prezidenti Túrkmen xalqınıń milliy jetekshisine onıń qálemine tiyisli «Aqıl-oy gáwharı» kitabınıń ózbek tilindegi nusqasın tapsırdı.
Eki tárepleme sóylesiwler sońında Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovqa Ózbekstan Respublikasınıń joqarı mámleketlik sıylıǵı – «Oliy Darajali Dwstlik» ordenin saltanatlı tapsırıw máresimi bolıp ótti.
Mámleketimiz basshısı sıylıqtı tapsırıp, Gurbanguli Berdimuhamedovtıń tuwısqan mámleketlerimiz arasındaǵı dástúriy doslıq, jaqsı qońsıshılıq hám strategiyalıq sheriklik qatnasıqların bekkemlewdegi úlken xızmetlerin atap ótti.
– Tuwısqan Túrkmenstannıń barlıq úlken jetiskenlikleri, keń kólemli jańalanıwları hám xalıqaralıq maydandaǵı abırayınıń joqarılawı Siziń atıńız benen tıǵız baylanıslı,-dedi Ózbekstan Prezidenti.
Túrkmenstanda ekonomikanıń turaqlı
turaqlı ósiwi támiyinlenbekte, xalıqtıń abadanlıǵı izbe-iz joqarılamaqta.
Prezidentimiz Túrkmen xalqınıń milliy jetekshisi tárepinen alǵa qoyılıp atırǵan global qáwipsizlik hám turaqlı rawajlanıwdı támiyinlew jolındaǵı xalıqaralıq baslamadardı ayrıqsha atap ótti. Gurbanguli Berdimuhamedovtıń jeke háreketleri sebepli Ózbekstan – Túrkmenstan qatnasıqları házirgi kúnde joqarı dárejege shıqqanı, haqıyqatında úlgi túrge engeni atap ótildi.
– Siziń járdemińiz benen 2017-jılı mámleketlerimiz strategiyalıq sherikliginiń bekkem tiykarı jaratıldı,-dedi Shavkat Mirziyoev.
Mámleketlerimiz parlamentleri, húkimetleri, aymaqları, isbilermenleri, jámiyetshiligi, ziyalıları hám jasları arasında jedel sóylesiwler, sawda-ekonomikalıq birge islesiw boyınsha baǵdarlama hám joybarlar ámelge asırılıp atırǵanı qanaatlanıwshılıq penen atap ótildi.
Mádeniy-gumanitarlıq birge islesiw joqarı dıqqatqa ılayıq. Máselen, ótken jılı Ashxabad hám Tashkentte Maqtımqulı shıǵarmalarınıń ózbek tilindegi toplamınıń prezenatciyası islendi, sonday-aq, Ashxabad xalıqaralıq kinofestivalında ózbek-túrkmen kórkem filminiń premerası bolıp ótti.
Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov kórsetilgen joqarı húrmet hám izzet ushın Prezident Shavkat Mirziyoev hám ózbek xalqına minnetdarshılıq bildirdi. Ázelden tuwısqan bolıp, jaqın qońsıshılıq dástúrleri tiykarında jasap kiyatırǵan ózbek hám túrkmen xalıqları arasındaǵı doslıq, birge islesiw bunnan bılay da bekkemleniwin, bul iygilikli iske úles qosıw ol ushın maqtanısh ekenligin atap ótti.
Máresimde shıǵıp sóylegenler Gurbanguli Berdimuhamedovqa Ózbekstan Respublikasınıń joqarı sıylıǵı tapsırılıwı kóp milletli xalqımızdıń belgili mámleketlik ǵayratkeri, búgingi Túrkmenstannıń milliy jetekshisi hám arxitektorı sıpatında oǵan qızǵın húrmet-izzetiniń belgisi bolǵanın atap ótti.
Rásmiy ilajlar juwmaqlanǵannan keyin, Shavkat Mirziyoev hám Gurbanguli Berdimuhamedov Kongress orayınıń Húrmetli miymanlar qıyabanında birgelikte emen teregin ekti.
Máresim eki tuwısqan arasındaǵı kóp ásirlik bekkem doslıq hám jaqsı qońsıshılıq baylanısları, Ózbekstan – Túrkmenstan strategiyalıq sheriklik qatnasıqların jáne de rawajlandırıw baǵdarındaǵı isenimli umtılıstıń belgisi boldı.
Ózbekstan Respublikası Prezidenti Shavkat Mirziyoev Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedov penen birge Samarqandtaǵı xalıqaralıq turizm orayında shólkemlestirilgen «Zamanlar hawazı» kórgizbesine bardı.
Miymanlarǵa kórgizbeniń tiykarǵı bólegi – túngi sahra kórinisi kórsetildi. Juldızlı aspanda músheller, Mırza Ulıǵbek kartası hám meridianlar kórinedi. Tamashagóy Ullı Jipek jolı boylap háreketlenip atırǵan kárwan sıyaqlı kum tóbeshikler arasınan ótedi. Jol boylap insaniyat civilizaciyasınıń rawajlanıw tariyxı sáwlelendirip barıladı.
Jolda Túrkmen otawı ushırasadı. Túrkmen baqsısınıń qosıǵı jańlaydı.
Ózbek hám túrkmen hayal-qızları, biri swzana tikse, ekinshisi túrkmen gilemin toqıydı.
Ustalar hám qurılısshılar qalasında xudojnikler, ónermentlerdiń názik talǵam hám joqarı sheberlik penen jaratılǵan dóretiwshilik shıǵarmaları kórinedi.
Ózbekstan hám túrkmen kórkem óner wákilleriniń atqarıwında duwtar hám tambur shertildi, ullı shayırlar Áliysher Nawayı hám Maqtımqulı ǵázelleri oqıldı.
Innovaciyalıq prezentaciyada arnawlı namalar hám teatrlastırılǵan saxnalar keń qollanılǵanı miymanlarda úlken tásir qaldırdı.
Bul kórgizbe – doslıq tariyxıy, ótmishten sabaq alıp, keleshekti birgelikte qurıwǵa shaqırıq ekenin aytıw múmkin. Xalıqlardı jaqınlastırıw ushın kóbirek kópirler kerek bolǵan bir waqıtta, mine usınday ekspoziciya arqalı qońsı mámleketke «bizdi tek ǵana tariyx emes, al ulıwmalıq keleshek birlestiredi» dep ayta alıw – joqarı diplomatiya úlgisi bolıp esaplanadı.
Túrkmen xalqınıń milliy jetekshisi, Túrkmentsan Xalıq Másláháti Baslıǵı Gurbanguli Berdimuhamedov elimizge ámelge asırǵan saparı juwmaqlandı. Joqarı mártebeli miymandı Samarqand xalıqaralıq aeroportında Ózbekstan Respublikası Prezidenti Shavkat Mirziyoev shıǵarıp saldı.
Álbette, Túrkmen xalqı milliy jetekshisiniń mámleketimizge saparı hám mámleketimiz basshısı menen ótkergen nátiyjeli sóylesiwleri Ózbekstan hám Túrkmenstan arasındaǵı startegiyalıq sheriklik qatnasıqların jáne de rawajlandırıwǵa hám ázeliy tuwısqan ózbek hám túrkmen xalıqlarınıń doslıq baylanısların bekkemlewge xızmet etiwi menen tariyxıy áhmiyetke iye.

Ziyodulla JONIBEKOV,
Ikrom AVVALBOEV,
Ǵolib HASANOV,
ÓzAnıń arnawlı xabarshıları