Korrupciyaǵa qarsı gúresiwdi hár bir xızmetker, shólkem ózinen baslawı kerek. Sonda jámiyettiń rawajlanıwına irkinish jasap atırǵan bul illetti saplastırıw múmkin.

Shólkemlerdegi korrupciyaǵa qarsı ishki qadaǵalaw bólimleriniń jumısın kúsheytiwge itibar qaratılıp atırǵanınıń sebebi de usında.
Bul mámleketimiz basshısınıń usı jıl 21-apreldegi “Mámleketlik uyımlar hám shólkemlerdiń korrupciyaǵa qarsı ishki qadaǵalaw bólimleriniń erkinligin támiyinlew hám jumıs nátiyjeliligin arttırıw ilajları haqqında”ǵı qararında názerde tutılǵan.
Qarardıń orınlanıwı boyınsha Korrupciyaǵa qarsı gúresiw agentligi tárepinen qanday jumıslar ámelge asırıladı?
– Agentliktiń Esap-sanaq palatası, Mámleketlik aktivlerdi basqarıw agentligi hám basqa juwapker ministrlikler hám uyımlar menen birgelikte hár jılı mámleketlik uyımlar hám shólkemlerde korrupciyaǵa qarsı ishki qadaǵalaw bólimleri shólkemlestiriliwin monitoring etip baradı, – dedi Korrupciyaǵa qarsı gúresiw agentligi direktorınıń orınbasarı Umed Mavlonov. – Monitoring nátiyjeleri boyınsha Korrupciyaǵa qarsı gúresiw boyınsha milliy keńeske málimleme kirgizedi.
Bul tarawdaǵı jumıslar Prezident qararınan keyin kúsheytilmekte. Jumıslardıń nátiyjeliligin arttırıw maqsetinde 2027-jıl 1-yanvarǵa shekem Densawlıqtı saqlaw, Qurılıs hám turaq jay kommunal xojalıǵı, Suw xojalıǵı ministrlikleri, “Ózbekneftgaz” hám “Ózsuwtámiynat” akcionerlik jámiyetleriniń korrupciyaǵa qarsı ishki qadaǵalaw bólimleriniń basshısı lawazımına Korrupciyaǵa qarsı gúresiw agentliginiń xızmetkerleri tayınlanadı.
Huqıqıy eksperiment túrinde engiziletuǵın bul sistemadan gózlengen maqset usı shólkemlerdiń korrupciyaǵa qarsı ishki qadaǵalaw sistemasınıń jumısın kúsheytiw bolıp espalanadı.
Agentlik usı shólkemler menen birgelikte bir ay múddette korrupciyaǵa qarsı ishki qadaǵalaw bólimi xızmetkerleri jumısınıń huqıqıy eksperiment dawamındaǵı eń áhmiyetli nátiyjelilik kórsetkishleri (KPI)in anıqlaydı.
Huqıqıy eksperimenttiń ámelge asırılıwı boyınsha hár yarım jılda Korrupciyaǵa qarsı gúresiw boyınsha milliy keńeske málimleme kirgiziledi. Huqıqıy eksperimenttiń nátiyjelerine qarap 2027-jıl 1 –yanvarǵa shekem bul sistemanı basqa mámleketlik uyımlar hám shólkemlerge de engiziw boyınsha tiykarlanǵan usınıslar tayarlanadı.
Házirgi waqıtta usı maqsette Mámleketlik uyımlar hám shólkemlerdiń korrupciyaǵa qarsı ishki qadaǵalaw bólimleri haqqındaǵı úlgi reje tayarlanbaqta.
Korrupciyaǵa qarsı ishki qadaǵalaw bólimleriniń basshıları hám xızmetkerlerin lawazımǵa tayınlaw hám bosatıwdı Agentlik penen kelisiw tártibi, Korrupciyaǵa qarsı ishki qadaǵalaw bólimleri xızmetkerleri jumısınıń eń áhmiyetli nátiyjelilik kórsetkishleri (KPI)in tastıyıqlaw hám bahalaw tártibi belgilenbekte.
Korrupciyaǵa qarsı ishki qadaǵalaw bólimleri xızmetkerleriniń mamanlıǵın arttırıw, olardı stajirovka hám attestaciyadan ótkeriw tártibi tayarlanbaqta.
Úsh ay múddette korrupciyaǵa qarsı ishki qadaǵalaw bólimleri xızmetkerleriniń kásiplik standartları islep shıǵıladı hám belgilengen tártipte tastıyıqlanadı.
2025-jıl 1-iyulge shekem elektron E-anticor.uz platformasında korrupciyaǵa qarsı ishki qadaǵalaw bólimleriniń basshıları hám xızmetkerleriniń elektron reestrin júrgiziw jolǵa qoyıladı.
Korrupciyaǵa qarsı ishki qadaǵalaw bólimleri xızmetkerleriniń jumısın eń áhmiyetli nátiyjelilik kórsetkishleri (KPI) tiykarında bahalaw nátiyjeleri boyınsha hár yarım jılda Korrupciyaǵa qarsı gúresiw boyınsha milliy keńeske málimleme kirgizip barıladı.

Norgul Abduraimova, ÓzA