Ózbekstan Oliy Majlisi Senatınıń Baslıǵı Tanzila Norboeva Anqaraǵa saparı sheńberinde Túrkiya Ullı Millet Májilisiniń Baslıǵı Numan Kurtulmush penen ushırasıw ótkerdi.

Sóylesiw waqtında eki mámleket basshılarınıń bekkem siyasiy erk-ıqrarı hám doslıq qatnasıqları sebepli Ózbekstan-Túrkiya baylanısları hár tárepleme strategiyalıq sheriklik dárejesine kóterilgeni atap ótildi.
Parlamentler mámleketleraralıq birge islesiwdi tereńlestiriwde barǵan sayın belsene qatnasıp atırǵanı atap ótildi. Joqarı dárejede erisilgen kelisimlerdiń orınlanıwı ústinen parlamentlik qadaǵalawdıń áhmiyetli ekenligi, sonday-aq, tiyisli komitetler hám doslıq toparları arasındaǵı birge islesiwdi kúsheytiw zárúrligine itibar qaratıldı.
Mádeniy-gumanitarlıq baylanıslar, ásirese, bilimlendiriw hám turizm tarawlarındaǵı birge islesiwdi keńeytiw, jaslar hám aymaqlararalıq tájiriybe almasıw zárúr ekenligi atap ótildi. Túrkiy tilles mámleketlerdiń parlamentleri hám Túrkiy mámleketler shólkemi sheńberindegi baylanıslardı tereńlestiriw máseleleri dodalandı.
Ushırasıw juwmaǵında parlamentler arasındaǵı birge islesiwdi jáne de joqarı basqıshqa kóteriwge qaratılǵan Ózbekstan Respublikası Oliy Majlisi menen Túrkiya Ullı Millet Májilisi arasında birge islesiw Protokolına qol qoyıldı.
Bul hújjet Ózbekstan hám Túrkiya arasındaǵı parlamentleraralıq birge islesiwdi sapa jaǵınan jańa basqıshqa alıp shıǵıwǵa xızmet etedi. Eki mámlekettiń nızam shıǵarıwshı uyımları óz-ara tájiriybe almasıwı, nızamshılıq procesinde tıǵız birge islesiwi názerde tutılǵan bolıp, usı tárizde ulıwma máplerge xızmet etetuǵın tarawlarda – siyasat, ekonomika, mádeniyat, bilimlendiriw, jaslar hám sport baǵdarlarında jáne de jedel hám sistemalı birge islesiw jolǵa qoyıladı. Bul tek ǵana eki mámleket arasındaǵı doslıq qatnasıqların bekkemlew emes, al pútkil regionda turaqlılıq hám rawajlanıwǵa xızmet etetuǵın áhmiyetli diplomatiyalıq qádem bolıp esaplanadı.

***

Usı kúnniń ózinde delegaciya aǵzaları Ózbekstannıń tariyxı, mádeniyatı hám zamanagóy rawajlanıwına baǵıshlanǵan kitaplar menen basılımlar usınılǵan parlament kitapxanasınıń jumısı menen de tanıstı.
Senat Baslıǵı Tanzila Norboeva Túrkiya Ullı Millet Májilisi Húrmetli miymanlar kitabında jazıw qaldırıp, eki tárepleme parlamentleraralıq baylanıslardı bekkemlew áhmiyetli ekenligin atap ótti.

ÓzA