Ukraina prezidenti Vladimir Zelenskiy Qrım Rossiyaǵa hesh qashan rásmiy berilmeytuǵının aytqanınan keyin jáne bir márte AQSh jetekshisi sınǵa aldı, dep jazbaqta «CNN» basılımı.

– Zelenskiydiń ǵázeplendiriwshi bildiriwleri kelispewshilikti saplastırıwdı qıyınlastırmaqta. Ukraina ushın jaǵday awır. Házir tınıshlıqqa erisiw múmkin yamasa pútkil mámleketti joǵaltıwdan aldın jáne úsh jıl gúresiw múmkin, – dep jazdı Tramp óziniń «Truth Social» betinde.
RF raketaları paytaxt Kiev hám mámlekettiń ekinshi iri qalası Xarkovqa Tramptıń usı postınan bir neshe saat ótip soqqı bergen. Ukraina rásmiyleri sońǵı hújimlerde keminde toǵız adam qaytıs bolǵanın hám 70 ke shamalas adam jaraqatlanǵanın málim etti.
Waqıyalardıń rawajlanıwı Rossiya-Ukraina kelispewshiligin saplastırıwda diplomatiyalıq háreketlerge jańa kelispewshiliklerdi tuwdırmaqta.

Qaraqalpaqstan xabar agentligi