Jáhán densawlıqtı saqlaw shólkeminiń xabarına bola, 2024-jılı Evropa regionında qızamıq penen keselleniwge baylanıslı 127 mıńnan aslam jaǵday dizimge alınǵan. Bul kórsetkish 2023-jılǵa salıstırǵanda eki esege kóp bolıp, bul 1997-jıldan berli dizimge alınǵan eń joqarı kórsetkish bolıp esaplanadı.

Ózbekstanda qızamıqqa qarsı shanshıw Milliy shanshıw kalendarı tiykarında ámelge asırıladı. 2024-jılı shanshılǵan balalardıń qamtıp alınıwı 99,3 procentti quraǵan. Soǵan qaramastan, respublikanıń ayırım aymaqlarında qızamıq penen keselleniw jaǵdayları dizimge alınǵan.
Senattıń Ilim, bilimlendiriw hám densawlıqtı saqlaw máseleleri komiteti tárepinen Xalıqaralıq immunizaciya hápteligi sheńberinde «Qızamıq keselliginiń artıw sebepleri, aldın alıw ilajları» atamasında ótkerilgen dógerek sáwbetinde bul haqqında sóz boldı.
Qánigeler tárepinen qızamıq keselliginiń aldın alıwda balalardı waqtında hám tolıq shanshıw eń nátiyjeli ilaj ekeni atap ótildi. Sonıń ishinde, qızamıq, qızılsha hám tepkige qarsı bala birinshi márte 12-15 aylıǵında, ekinshi márte balalar baqshasına barıwdan aldın, yaǵnıy 4-6 jasta shanshılıwı kerek ekenligi atap ótildi. Úgit-násiyat ilajlarına «máhálle jetiligi» hám pútkil jámiyetshilik birgelikte qatnasıwı zárúr ekenligi atap ótildi.
Densawlıqtı saqlaw tarawı boyınsha xalıqaralıq hám jergilikli ekspertler mámleket qızamıqqa qarsı vakcina menen úzliksiz támiyinlep atırǵanın, qızamıq keselligin emlew processleri zamanagóy emlew protokolları arqalı ámelge asırılıp atırǵanın atap kórsetti.
Senatorlar, taraw qánigeleri, xalıqaralıq shólkemlerdiń ekspertleri, ministrlikler, uyımlar hám ǵalaba xabar qurallarınıń wákilleri qatnasqan dógerek sáwbetiniń juwmaǵında qızamıq tarqalıwına shek qoyıw hám Ózbekstandı qızamıqtan jıraq aymaqqa aylandırıw boyınsha anıq usınıslar islep shıǵıldı.

N.Abduraimova, ÓzA