Keyingi kúnleri «bajısız tovarlar muǵdarı azaydı» degen jańalıq boyınsha sociallıq tarmaqlarda hár qıylı pikirler bildirilmekte. Biraq, máseleniń mánisin túsinsek, bul qarar xalqımız hám ekonomikalıq rawajlanıwımız ushın paydalı ekenligin kóremiz.

Hámmemiz kún ara bazarlardaǵı bahanıń kóterilip atırǵanınan, shetten arzımaǵan pulǵa alıp kelingen ónimler qımbat satılıp atırǵanınan narazı bolıp, jergilikli islep shıǵarıwshılardı qollaw kerek, nege ózimizde jumıs orınları az dep nalıymız.
Endi sonı ámelge asırıw ushın qádem taslandı. Sırt elden kóp muǵdardaǵı tovarlar ǵalabalıq túrde alıp kirilse, bul jerde islep atırǵan isbilermenler qalay básekilese aladı?
Qalaberdi, bul kirgizilgen normalar ápiwayı adamlarǵa tásir etpeydi. Bul sheklewler siz jeke mútájligińiz ushın alıp kelip atırǵan 1-2 telefon, noutbuk, kiyim-kenshekke tiyisli emes. Biraq on-on beslep texnika alıp kirip, payda kóriw niyetindegi kommerciyashılar ushın tártip hám intizam boladı.
Bunday tártip tek ǵana bizde bar emes. Dúnyada bizden de qattı rejimde jergilikli islep shıǵarıwshılar qorǵaladı. Mısalı ushın, Evropada hawa arqalı bajısız limit – 480 dollar, Túrkiyada – 480 dollar, Singapurda – 500 dollar, Yaponiyada kurerlik ushın tek ǵana – 88 dollar bolsa, Kanadada bunnan da az bajısız limit 15 dollar.
Bul tártipti engiziwden maqset tutınıwshılardıń mápin qorǵawdan ibarat. Bul ilajlar negizinde sheklew de emes, al dúnyada júz berip atırǵan quramalı sharayatta milliy ekonomikamızdıń turaqlı jumısın támiyinleytuǵın zárúr ilaj bolıp esaplanadı.

Qaraqalpaqstan xabar agentligi