Rossiya Federaciyası delegaciyası Nawayı qalasınıń eksport hám import potencialın úyreniw, sonday-aq, jergilikli óndirisshilerdiń jumısı, imkaniyatları hám xalıqaralıq birge islesiw perspektivaları menen jaqınnan tanısıw maqsetinde keldi.
Olardı Nawayı temir jol vokzalında qala hákimi Dilmurod Ergashev hám bir topar rásmiyler kútip aldı.
Delegaciya aǵzaları “Nawayı isenim gilemleri” JShJ qospa kárxanasına bardı.
Qánigeler tárepinen delegaciya aǵzalarına dáslepki shiyki zattı qayta islew, jip iyiriw, reń beriw, naǵıslar túsiriw, gilem toqıw hám tayar ónimdi qadaqlawǵa shekemgi tolıq óndiris izbe-izligi haqqında hár tárepleme maǵlıwmatlar berildi. Processlerde zamanagóy texnologiyalar hám joqarı ónimli avtomatlastırılǵan úskene jáne liniyalardan paydalanılıp atırǵanı, bul bolsa ónimniń sapasın arttırıw hám óndiris kólemin keńeytiw imkaniyatın berip atırǵanı ayrıqsha atap ótildi.
Bul kárxana 2003-jılı shólkemlestirilgen bolıp, búgingi kúnde 3 smenada 500 ge shamalas jumısshı jumıs alıp baradı.
Házirgi waqıtta bul jerde gilem islep shıǵarıw menen birge gilemlerdi ximiyalıq tazalaw hám qurılıs materialların islep shıǵarıw jolǵa qoyılǵan.
Kárxanada óndiris quwatlılıǵın arttırıw maqsetinde texnologiyalıq jańalanıwlarǵa qol urılǵan. Házirgi waqıtta jumıs nátiyjeliligi joqarı bolǵan eki rapirali toqıw úskenesi alıp kelingen. Bul stanok jılına 1 million 120 mıń kvadrat metr kólemdegi gilem islep shıǵarıw imkaniyatın beredi hám energiya jumsalıwın sezilerli dárejede azaytadı.
Búgingi kúnde “Nawayı isenim gilemleri” JShJ qospa kárxanasınıń ónimlerine bolǵan talap artıp barmaqta. Házirgi waqıtta ónimler Rossiya hám basqa da ǴMDA mámleketlerine eksport etiledi.
Kárxanada Rossiya mámleketi menen sawda-ekonomikalıq birge islesiwdi keńeytiw perspektivaları boyınsha nátiyjeli sóylesiwler alıp barıldı.
Sóylesiwler dawamında rossiyalı birge islesiwshiler tárepinen kárxananıń eksport potencialı hám aldaǵı birge islesiw baǵdarları ayrıqsha atap ótildi.
A.Bwriev,
ÓzAnıń xabarshısı