Eki tárepleme sóylesiwlerdiń juwmaǵında Túrkmen xalqınıń milliy jetekshisi, Túrkmenstan Xalıq Másláháti Baslıǵı Gurbanguli Berdimuhamedovqa Ózbekstan Respublikasınıń joqarı mámleketlik sıylıǵı – “Oliy Darajali Dwstlik” ordenin saltanatlı tapsırıw máresimi bolıp ótti.

Mámleketimiz basshısı sıylıqtı tapsırıp, Gurbanguli Berdimuhamedovtıń tuwısqan mámleketlerimiz arasındaǵı dástúriy doslıq, jaqın qońsıshılıq hám strategiyalıq sheriklik qatnasıqların bekkemlewdegi úlken xızmetlerin ayrıqsha atap ótti.
– Tuwısqan Túrkmenstannıń barlıq úlken jetiskenlikleri, keń kólemli jańalanıwları hám xalıqaralıq maydandaǵı abırayınıń artıwı siziń atıńız benen tıǵız baylanıslı, – dedi Ózbekstan Prezidenti.
Túrkmenstanda ekonomikanıń turaqlı ósimi támiyinlenbekte, xalıqtıń abadanlıǵı izbe-iz artpaqta. Prezidentimiz Túrkmen xalqınıń milliy jetekshisi tárepinen alǵa qoyılıp atırǵan global qáwipsizlik hám turaqlı rawajlanıwdı támiyinlew jolındaǵı xalıqaralıq baslamalardı ayrıqsha atap ótti.
Usı múnásibet penen Gurbanguli Berdimuxamedovtıń 2025-jıldı “Tınıshlıq hám isenim jılı” dep járiyalaw haqqındaǵı usınısı xalıqaralıq kólemde keńnen qollap-quwatlanǵanı atap ótildi.
Túrkmenstan jetekshisiniń jeke háreketleri sebepli Ózbekstan -Túrkmenstan qatnasıqları búgingi kúnde joqarı dárejege shıqqanı, haqıyqatında da úlgi bolarlıqtay túrge engeni atap ótildi.
– Jeke siziń járdemińiz benen 2017-jılı mámleketlerimiz strategiyalıq sherikliginiń bekkem tiykarı jaratıldı, – dedi Shavkat Mirziyoev.
Mámleketlerimiz parlamentleri, húkimetleri, aymaqları, isbilermenleri, jámiyetshiligi, zıyalıları hám jasları arasında jedel sóylesiwler, sawda-ekonomikalıq birge islesiw boyınsha baǵdarlama hám joybarlardıń ámelge asırılıp atırǵanı qanaatlanıwshılıq penen atap ótildi. Máselen, keyingi jılları tovar almasıw bir neshe esege kóbeyip, 1 milliard dollardan arttı.
Mádeniy-gumanitarlıq birge islesiw joqarı itibarǵa ılayıq. Máselen, ótken jılı Ashxabad hám Tashkentte Maqtımqulı shıǵarmalarınıń ózbek tilindegi toplamı tanıstırıldı, sonday-aq, Ashxabad xalıqaralıq kinofestivalında ózbek-túrkmen kórkem filminiń premerası bolıp ótti.
Gurbanguli Berdimuhamedovqa Ózbekstan Respublikası joqarı sıylıǵınıń tapsırılıwı kóp milletli xalqımızdıń belgili mámleketlik ǵayratkeri, búgingi Túrkmenstannıń milliy jetekshisi hám arxitektorı sıpatında oǵan bolǵan joqarı húrmet-izzetiniń kórinisi bolǵanı atap ótildi.

ÓzA