Ózbekstan paytaxtı Tashkent qalasında Oraylıq Aziya mámleketleri arnawlı xızmetleri basshılarınıń birinshi ushırasıwı bolıp ótti. Bul ilaj Ózbekstan Respublikasınıń Oraylıq Aziya mámleketleri basshılarınıń VII Másláhát ushırasıwındaǵı basshılıǵı sheńberinde shólkemlestirildi.

Ilajdıń ashılıwında qatnasıwshılarǵa Ózbekstan Respublikası Prezidenti Shavkat Mirziyoevtiń múrájatı oqıp esittirildi. Onda Oraylıq Aziya mámleketleri arnawlı xızmetleriniń sóylesiwi regionallıq qáwipsizlikti támiyinlew boyınsha birgeliktegi qatnaslar hám tásirsheń mexanizmlerdi islep shıǵıwǵa xızmet etetuǵını atap ótildi.
Ushırasıw dawamında tiykarǵı itibar region mámleketleri qáwipsizligine zamanagóy qáwip-qáterlerge baha beriwdiń birden-bir kózqarasların islep shıǵıw, sonday-aq, olardı saplastırıwda arnawlı xızmetler arasında óz-ara birge islesiwdiń nátiyjeliligin arttırıw máselelerine qaratıldı.
Tárepler regionallıq qáwipsizlik, terrorizm, ekstremizm, nızamsız narkotik hám qural-jaraq aylanısına qarsı gúresiw, transmilliy jınayatshılıq, málimleme hám kiberqáwipsizlikti támiyinlew tarawlarındaǵı áhmiyetli máselelerdi hám óz-ara paydalı basqa da birge islesiw baǵdarların dodaladı.
Bul ilaj Oraylıq Aziya mámleketleri arasında qáwipsizlik tarawındaǵı birge islesiwdi rawajlandırıwda áhmiyetli basqısh bolıp, regionımızda tınıshlıq hám turaqlılıqtı jáne de bekkemlew maqsetinde arnawlı xızmetler basshılarınıń turaqlı ushırasıwlarına tiykar saldı.

ÓzA