Yaponiyada 2024-jılı 529 jas óspirim mektep oqıwshısı óz janına qastıyanlıq etti – bul baqlawlar tariyxındaǵı eń jaman kórsetkish, dep xabar berdi South China Morning Post húkimet maǵlıwmatlarına tiykarlanıp.

Asahi gazetasınıń jazıwınsha, Yaponiya G7 mámleketleri arasında óz janına qastıyanlıq etiw – jas óspirimler arasında tiykarǵı ólim sebepshisi bolǵan birden-bir mámleketke aylandı.
Tiykarǵı sebepler – stress, oqıwdaǵı mashqalalar, zamanlasları menen tartıs hám keleshekten qorqıw. Ólim jaǵdaylarınıń yarımınan kóbisi usı faktorlar menen baylanıslı. Qalǵan jaǵdaylarda depressiya (ruxıy túskinlik) hám salamatlıq penen baylanıslı basqa mashqalalar, 20 procentinde shańaraqtaǵı tartıslar sebep etip kórsetilgen.
Mektep oqıwshıları arasında ólimshilik jaǵdayları kóbeyiwi menen birge, mámlekette óz janına qastıyanlıq etiwdiń ulıwma sanı qısqarǵan. 2024-jılı 20 320 usınday jaǵday júz berdi, yaǵnıy bir jıl aldıńǵıdan 1 517 az yamasa 1978-jıldan berli eń tómen kórsetkish. Úlken jastaǵılar arasında óz janına qastıyanlıq etiw qarjı qıyınshılıqları hám shańaraqlıq mashqalalar menen baylanıslı.

Qaraqalpaqstan xabar agentligi