Qurama Shtatlar hám Iran Islam Respublikası arasındaǵı yadrolıq sóylesiwler hár eki táreptiń jaqsı kelisip atırǵanın bildirmekte, dep xabar bermekte “CNN” basılımı.

Ótken hápteniń aqırında Omanda bolıp ótken dáslepki basqıshtan soń eki mámleket delegaciyaları gezektegi sóylesiwler ushın Rimde ushırastı. Endi Persiya qoltıǵında jaylasqan Oman Sultanlıǵı shembi kúni Maskatta kútilip atırǵan joqarı dárejedegi úshinshi raundqa dáldalshılıq etedi.
Tramp hákimshiligi sońǵı sóylesiwlerden soń unamlı ózgerislerge toqtap, “júdá jaqsı rawajlanıw”ǵa úmit bildirdi hám tárepler usı háptede “jáne ushırasıwǵa kelisip alǵanın” málim etti.
Iran sırtqı isler ministri Abbos Aragchi de sóylesiwler kewildegidey ótkenin atap ótti.
– Alǵa ilgerilew bar dep aytıwım múmkin, – dedi ol. – Biz Rim sóylesiwlerinde ayırım principler hám maqsetler boyınsha bir-birimizdi jaqsıraq túsindik.
Aldınıraq, prezident Donald Tramp rásmiy Vashington Tegeran menen kelisimge erise almasa, AQSh Izrail járdeminde Irannıń yadro obektlerine áskeriy soqqılar beriw menen qorqıtqan edi.

ÓzA