Nızam joybarına sholıw

Mámleketimizde rieltorlıq xızmetler bazarındaǵı talaplardı qanaatlandırıw maqsetinde rieltorlıq jumısın rawajlandırıw, bul xızmetlerdiń sapasın arttırıw boyınsha keń kólemli jumıslar ámelge asırılmaqta. Biraq rieltorlıq jumısın tártipke salıw tarawında ámeldegi normativlik-huqıqıy hújjetlerdi zamanagóy tendenciyalarǵa hám nızamshılıqtaǵı ózgerislerge muwapıqlıǵın úyreniw, tikkeley ámel etetuǵın nızam joybarın islep shıǵıw zárúrligi payda bolmaqta.
Usı maqsette «Rieltorlıq jumısı haqqında»ǵı nızam joybarı islep shıǵılıp, parlament tómengi palatası tárepinen birinshi oqıwda qabıl etildi.
Bul nızam joybarı menen rásmiy emes dáldalshılar (maklerler) – jeke tártiptegi isbilermen hám ózin-ózi bánt etken shaxslarǵa «kóshpes múlk boyınsha agent» sıpatında rieltorlıq subektleriniń durıs esabın júrgiziw hám nátiyjeli monitoringti jolǵa qoyıw maqsetinde «Rieltorlar subektleriniń birden-bir reestri» málimleme sisteması engizilmekte.
Sonday-aq, bankten tısqarı aylanıstı, sol arqalı jasırın ekonomikanı qısqartıw, rieltorlıq xızmetlerin «bir ayna» principi tiykarında kórsetiw maqsetinde kóshpes múlk obektleriniń elektron sawdasın hám esap-sanaqlardı elektron túrde ámelge asırıw imkaniyatın beriwshi multilisting sistemaların (elektron sawdasın) shólkemlestiriw belgilenbekte.
Joybar menen rieltorlıq jumısı tarawındaǵı professionlar jámiyetlik birlespelerdiń ornın keńeytiw, olarǵa jańa wazıypalar hám wákillikler beriw de usınıs etilmekte. Sonıń ishinde, rieltorlıq subektlerin nızamlı jolǵa ótkeriwde qollap-quwatlawshı ilaj sıpatında olarǵa kóshpes múlk bazarında reklama hám másláhát xızmetlerin kórsetiw huqıqı berilmekte.
Bul nızam joybarınıń qabıl etiliwi rieltorlıq jumısı tarawındaǵı xızmetlerdiń sapasın arttırıw, rieltorlıq subektleri jumısınıń ashıq-aydınlıǵın támiyinlew, tarawda jasırın ámeliyatlardı qısqartıwǵa xızmet etedi. Kóshpes múlk boyınsha agent kategoriyasınıń kirgiziliwi arqalı jasırın bazar qısqarıwı támiyinlenedi. Tarawda professional jámiyetlik birlespelerdiń roli keńeyip, básekige shıdamlılıq artadı.

Muhtarama Komilova, ÓzA