Kópshilikke málim bolǵanınday sońǵı jılları elimizde barlıq tarawlar sıyaqlı, sport tarawına qaratılıp atırǵan ayrıqsha itibar hám sportshılarımızdıń Aziya, jáhán chempionatları, Olimpiada oyınlarında qolǵa kirgizgen tabıslarınıń nátiyjesinde, mámleketimiz sportı rawajlanǵan kúshli ellerdiń qatarına kirip barmaqta.

Ásirese, jaslarımız tárepinen xalıqarlıq maydanlarda qolǵa kirgizilgen jeńisler joqarıda aytıp ótken sózimizdiń ayqın dáliyli bolıp tabıladı. Sonıń menen birge, elimizde ǵalabalıq sporttı en jaydırıwǵa da itibar qaratılıp, onı ele de rawajlandırıw maqsetinde, hár qıylı jarıslar ótkerilip kelinbekte.
Ózbekstan Respublikası Prezidentiniń 2020-jıl 24-yanvardaǵı «Ózbekstan Respublikasında denetárbiyası hám sporttı bunnan bılay da jetilistiriw hám ǵalaba en jaydırıw ilajları haqqında»ǵı qararı hám Ózbekstan Respublikası Ministrler Kabinetiniń 2025-jıl 15-marttaǵı «Qorshaǵan ortalıqtı qorǵaw hám «Jasıl» jılı sheńberinde «Eco-Save Aral-2025 hám Insan ushın» xalıqaralıq qayırqomlıq hám ekologiyalıq ǵalaba juwırıw jarısların ótkeriwge tayarlıq kóriw hám olardı joqarı dárejede shólkemlestiriw haqqındaǵı»ǵı protokolı tiykarında, usı jıldıń may hám oktyabr aylarında «Eco-Save Aral-2025 hám Insan ushın» xalıqaralıq qayırqomlıq hám ekologiyalıq ǵalaba juwırıw jarısların ótkeriw rejelestirilgen.
Nókis qalasındaǵı 2-sanlı sport mektebinde usı ǵalabalıq sport jarısın ótkeriwdiń maqseti hám oǵan tayarlıq jumıslarına baǵıshlanǵan baspasóz ánjumanı bolıp ótti.
Ilajǵa sport ministrligi, Jaslar isleri agentliginiń juwapker wákilleri hám ǵalaba xabar qurallarınıń xızmetkerleri qatnastı.
Ánjumanda Qaraqalpaqstan Respublikası Sport ministrliginiń bólim baslıǵı I.Qudiyarov hám Jaslar isleri agentligi Qaraqalpaqstan Respublikası basqarmasınıń bólim baslıǵı Ǵ. Seytimovlar tárepinen jarıstıń ótkeriw tártibi, jarıs qatnasıwshıları, tiykarǵı maqset hám wazıypaları boyınsha keń túsinikler berildi.
Sonday-aq, ilajda «Jańa nápes» hám «Jańa nápes – Ekiden» ǵalabalıq juwırıw jarısların ótkeriwge tayarlıq kóriw hám joqarı dárejede ótkeriliwi hám Bes baslama olimpiadasınıń ótkeriliw hám sıylıqlaw tártibine de toqtap ótildi.
-Bıyılǵı juwırıw marafonınıń burınǵılarınan ózgesheligi, ótkeriletuǵın jarısta adaptiv sport túrleri boyınsha da jarıslar ótkeriledi,-deydi Ikram Qudiyarov.
Ilajda jurnalistler tárepinen bayanatshılarǵa bir qatar sorawlar berilip, olarǵa tiyisli juwap aldı.

Adilbay Orazov,
Qaraqalpaqstan xabar agentligi sholıwshısı.