Prezident 21-aprel kúni qol qoyılǵan párman tiykarında Ózbekstanda toylardı tártipke salıwdı názerde tutıwshı joybar islep shıǵıladı.

Atap ótiliwinshe, usı jıldıń avgust ayına shekem toylar, shańaraqlıq saltanatlar, merekeler hám máresimler ótkeriliwin tártipke salıw boyınsha parlament palataları keńesleriniń birgeliktegi qararı qabıl etiledi. Sonday-aq, jaslarda únemlilik mádeniyatın qáliplestiriw boyınsha jańa mexanizmler islep shıǵıw da rejelestirilgen.
Joybarǵa Oliy Majlis palataları, Mádeniyat ministrligi, Shańaraq hám hayal-qızlar komiteti, Din isleri boyınsha komitet juwapkerler etip belgilendi.
2019-jıldıń 14-sentyabr kúni Ózbekstan Respublikası Oliy Majlisi Nızamshılıq palatası Keńesi hám Senat Keńesiniń «Toylar, shańaraqlıq saltanatlar, mereke hám máresimler ótkeriliwin tártipke salıw sistemasın jáne de jetilistiriw haqqında»ǵı birgeliktegi qararı qabıl etilgenin atap ótiw kerek. Ol 2020-jıl 1-yanvardan kúshke kirgen házir de nızamlı kúshke iye.
Oǵan bola, toylar, shańaraqlıq saltanatlar, mereke hám máresimler tek ǵana bir kún (jerlew máresimi buǵan kirmeydi), saat 06:00 hám 23:00 aralıǵında ótkeriledi.
Toylar, shańaraqlıq saltanatlar, mereke hám máresimlerde 200ge shekem, bul ilajlar múnásibeti menen as beriw máresiminde 250 ge shekem adam qatnasadı. Qos toylarda 250 ge shekem, onıń menen baylanıslı awqat beriw máresiminde bolsa 300 ge shekem adam qatnasıwı múmkin.
Hákimshilik juwapkershilik haqqındaǵı kodekske qosılǵan 1921-statyaǵa bola, toylar, shańaraqlıq saltanatlar, mereke hám máresimler ótkeriw tártibi ámel etpegen puqaralarǵa 10 BEM (házirgi waqıtta 3 mln 750 mıń sum), toyxana hám kafe-restoranlardıń lawazımlı shaxslarına 30 BEM (qaytadan islese, 50 BEM) muǵdarında járiyma belgilengen.

Qaraqalpaqstan xabar agentligi