Búgingi kúnde elimizdiń investiciyalıq tartımlılıǵın arttırıw, isbilermenlikti rawajlandırıw ushın keń imkaniyatlar jaratılmaqta. Bul baǵdarda Prezidentimiz tárepinen qabıl etilgen párman hám qararlar usı ilajlardıń jańa basqıshqa kóteriliwine bekkem tiykar bolıp xızmet etpekte.

Usınday iygilikli islerdiń dawamı retinde Nókis rayonı «Samanbay» awıl puqaralar jıyınında «Nukus broyler» kárxanasınıń ashılıw saltanatı bolıp ótti.
Onda Qaraqalpaqstan Respublikası Joqarı Keńesi Baslıǵınıń orınbasarı R.Saparbaev hám Nókis rayonı hákimi Z.Zaytov qatnasıp, jańa kárxananıń paydalanıwǵa tapsırılıwı múnásibeti menen jıynalǵanlardı qutlıqladı.
Ulıwma 40 mlrd.sum qarjı esabınan iske túsirilip atırǵan kárxanada jılına 1920 tonna tawıq góshi jetistiriledi. Házirgi waqıtta aymaqta jasawshı 35 adamnıń bántligi támiyinlengen bolıp, kárxananıń tolıq quwatlıqta iske túsiwi menen 100 ge shamalas jańa jumıs ornı jaratıladı.
Álbette, xalqımızdı azıq-awqat ónimleri menen támiyinlewge baǵdarlanǵan bunday jańa joybarlardıń kóbeyiwi hám iske túsiriliwi ѳz gezeginde elimizde «Insan qádiri ushın» principi tiykarında ámelge asırılıp atırǵan reformalardıń ámeliy kѳrinisi bolıp tabıladı.

Qaraqalpaqstan xabar agentligi