Usı kúnlerde Qıtayda jumıs saparı menen bolıp turǵan «Ózatom» agentligi delegaciyası atom energetikası tarawındaǵı xalıqaralıq birge islesiwdi jáne de bekkemlew hám Ózbekstanda atom elektr stanciyası (AES) qurılısınıń joybarın tiykarǵı texnikalıq hám shólkemlestiriw táreplerin dodalawǵa qaratılǵan bir qatar ushırasıw hám sóylesiwler ótkermekte.

Sapar sheńberinde «Ózatom» agentliginiń direktorı Azim Ahmedhwjaev basshılıǵındaǵı delegaciya Qıtay milliy yadro korporaciyası (CNNC) quramındaǵı sırt el joybarlarına juwapker CNOS ofisinde úsh tárepleme ushırasıwda qatnastı. Onda «Ózatom» agentligi, Rossiyanıń «Rosatom» mámleketlik korporaciyası hám Qıtaydıń “Shanghai Electric” kompaniyasınıń wákilleri qatnastı.
Sóylesiwler dawamında “Shanghai Electric” kompaniyasınıń turbina úskenelerin islep shıǵarıw potencialı, bul úskenelerdi Ózbekstandaǵı AES joybarı talaplarına beyimlestiriw imkaniyatları kórip shıǵıldı. Tárepler, sonday-aq, AEStiń yadrolıq bolmaǵan atawı ushın zárúr úskenelerdi islep shıǵıw, olardı jetkerip beriw hám texnikalıq belgileri boyınsha hár tárepleme pikir alıstı.
Ushırasıw juwmaǵında Qıtay tárepi «Ózatom», «Rosatom» hám CNNC arasında úsh tárepleme shártnamaǵa qol qoyıw baslaması menen shıqtı. Bul shártnama CNNCtiń Ózbekstandaǵı AES qurılısındaǵı anıq roli hám juwapkershiligin belgilewge xızmet etedi.
«Ózatom» agentligi málimleme xızmetiniń maǵlıwmatlarına bola, “Shanghai Electric” kompaniyası atom hám ıssılıq elektr stanciyaları ushın turbina hám energetika úskenelerin islep shıǵaradı. Ol usı kúnge shekem Qıtaydaǵı 37 hám Pakistandaǵı 2 AES ushın yadrolıq bolmaǵan ataw úskenelerin jetkerip bergen. Kompaniya islep shıǵaratuǵın turbogeneratorlardıń quwatlılıǵı 50 MVtdan 1240MVtǵa shekem jetedi.
Ózbekstan delegaciyasınıń saparı sheńberinde xalıqaralıq birge islesiwshiler menen joybardı ámelge asırıwda aldınǵı texnologiyalardı tartıw, isenimli úskene jetkerip beriwshiler menen birge islesiwdi keńeytiw máselelerine ayrıqsha itibar qaratılmaqta.

N.Ziyodullaeva, ÓzA