Prezident Shavkat Mirziyoev ximiya sanaatındaǵı joybarlardıń orınlanıwı hám tarmaqtı diversifikaciyalaw boyınsha rejelerdiń prezentaciyası menen tanıstı.

Reformalar nátiyjesinde tarmaqta bazar principleri engizilip, investiciyalarǵa keń jol ashıldı. Óndiris shınjırın keńeytiwge Nawayı, Ferǵana, Qońıratta 3 ximiyalıq klaster, Shırshıq hám Jizzaqta 2 texnopark shólkemlestirildi. Qoqand superfosfat zavodı tolıq modernizaciyalandı.
Keyingi bes jılda 23 jańa kárxana ashılıp, 4 mıńnan aslam jumıs orınları jaratıldı. Tarmaqqa xalıqaralıq brendler kirip keldi, kem tonnalı ónimler tayarlaw jolǵa qoyıldı. Usılardıń nátiyjesinde ximiya sanaatında óndiris 1,5 esege ósti.
Prezentaciyada juwapkerler bıyılǵı jumıslar hám rejeler haqqında esabat berdi.
Atap ótilgenindey, usı jıldıń birinshi shereginde tarmaqta 181 million dollarlıq investiciya ózlestirilgen, 39 million dollarlıq 3 joybar iske túsirilgen.
Endi ekinshi sherekte 170 million dollarlıq sırt el investiciyaların ózlestiriwdiń esabınan «jasıl» vodorod hám cian duzları kárxanaların iske qosıw rejelestirilgen.
Sanlastırıw procesi dawam ettirilip, tarmaqtıń birge islesiwshi tarawlar menen integraciyası keńeytiledi. Ximiya zavodlarınıń birden-bir ǵaznashılıq sistemasında qosımsha moduller ashıladı. «Birden-bir sanlı platforma» juwmaǵına jetkerilip, kárxanalardıń 15 ekonomikalıq kórsetkishleri sáwlelendiriledi.
Jáne bir áhmiyetli wazıypa – energiya nátiyjeliligi. Energiyanı únemlew hám óndiris quwatlıqlarınan paydalanıw dárejesin arttırıw arqalı ózine túser bahasın azaytıw zárúrligi atap ótildi.
Tarawda ele iske qosılmaǵan imkaniyatlar kóp ekeni kórsetip ótildi. Jedel rawajlanıp atırǵan ishki bazarda ónimge talap artıp atır. Jáhán bazarındaǵı turaqlı emes sharayat ta jańa wazıypalar qoymaqta.
Sonlıqtan tarmaqtı strukturalıq jaqtan ózgertiw, lokalizaciyalaw hám qosımsha qundı arttırıw ilajları dodalandı.
Juwapkerlerge házirgi zaman talapları hám aldaǵı ekonomikalıq prognozlar tiykarında ximiya sanaatın rawajlandırıw boyınsha baǵdarlama islep shıǵıwǵa ayrıqsha áhmiyet qaratıw zárúrligi kórsetip ótildi.

ÓzA