Ájiniyaz atındaǵı NMPI akademiyalıq liceyinde «Ashıq esikler kúni» bolıp ótti. Onda respublikamızdaǵı ulıwma bilim beriw mektepleriniń 9-klass pitkriwshileri qatnasıp, liceydegi bilim alıw ushın jaratılǵan sharayatlar menen tanıstı.

Májilisler zalında bolıp ótken ilajda licey direktorı Q.Xalqorazov oqıw ornında bilim alıw, joqarı oqıw ornına maqsetli tayarlaw, oqıwshılardı turaq jay menen támiyinlew, olardıń qábiletlerin júzege shıǵarıw hám bos waqıtların mazmunlı ótkeriw ushın jaratılǵan imkaniyatlar haqqında maǵlıwmatlar berip ótti.
Ilaj qatnasıwshıları akademiyalıq liceydiń oqıw procesi, sport zallar, kitapxana, biologiya hám ximiya páni laboratoriyaları, pán dógerekleri menen jaqınnan tanıstı. Sonday-aq, olardıń qatnasıwında «Zákawat» intellektuallıq oyını shólkemlestirildi.
Oqıw ornında búgingi kúnde 4 baǵdarda 560 oqıwshı tálim-tárbiya almaqta. Ózbekstan Respublikası Prezidentiniń 2020-jıl 13-dekabrdegi «Intalı jaslardı tańlap alıw hám akademiyalıq liceylerdiń jumısın jetilistiriw boyınsha ilajlar haqqında» ǵı qararı tiykarında liceyde barlıq pánler oqıw reje tiykarında terińlestirilip ótiledi. Akademiyalıq liceyde 65 joqarı kategoriyalı oqıtıwshı oqıwshı-jaslarǵa bilim sırların berip kelmekte.
-Oqıw ornımızda 43 oqıtıwshı milliy hám xalıqaralıq sertifikatqa iye. Usı oqıw jılında on oqıwshımız múddetinen aldın student bolıwǵa miyasar boldı. Sonday-aq usı oqıw jılı dawamında intalı oqıwshılardı qollap-quwatlaw maqsetinde «Akademiyalıq licey maqtanıshı» stipendiyası shólkemlestirilip, usı oqıw jılında 20 oqıwshı stipendiya iyesine aylandı,-deydi akademiyalıq licey direktorınıń orınbasarı G. Masharipova.

– Bul jerdegi tálim- tárbiyanıń teńdey alıp barılıwı nátiyjesinde kóplegen tabıslarǵa eristim. Bul ushın bilim bergen ustazlarıma minnetdarman,-deydi licey oqıwshısı Nuraliy Orazbaev. Nuraliy pánler olimpiadasınıń respublikalıq basqıshınıń jeńimpazı, NMPI stipendiantı sonday-aq, ximiya, biologiya, tariyx hám qaraqalpaq tili hám ádebiyatı pánleri boyınsha milliy sertifikatqa iye bolǵan intalı oqıwshı.
-Oqıw ornındaǵı jaratılǵan imkaniyatlardı kórip usı jerde oqıyman degen sheshimge keldim. Ata-anamda usı liceyde bilim alıwımdı qáleydi. Bul jerdegi tártip-intizam hám oqıwshılardıń tabısları meniń qızıǵıwshılıǵımdı arttırdı,-deydi paytaxtımızdaǵı 31-sanlı mekteptiń 9-klass oqıwshısı G. Sarsenbaeva.

Qaraqalpaqstan xabar agentligi