Bizge belgili, jańa redakciyadaǵı Konstituciyamızda puqaralardıń huqıqları hám erkinliklerin támiyinlew baǵdarındaǵı áhmiyetli kepilliklerden biri sıpatında huqıqbuzarlıqlardan jábirlengenlerdiń huqıqların nızam menen qorǵaw, jábirlengenlerge jetkerilgen zıyannıń ornı qaplanıwı ushın mámleket sharayatlar jaratıwı belgilengen.

Biraq, jınayat islegen adamlardı qamaqqa alıw bas sharası qollanılmaǵan jaǵdaylarda bul shaxslar Ózbekstan Respublikası Mámleketlik shegarasın tárk etip, sorastırıw, tergew yamasa sudtan jasırınıw jaǵdayları baqlanbaqta. Nátiyjede jınayattan jábirlengen shaxslardıń huqıqların tiklew, olarǵa jetkerilgen zıyanlardı qaplaw imkaniyatı tómenlemekte.
Usı maqsette islep shıǵılǵan, jınayat procesinde májbúrlew ilajları institutın jetilistiriwge qaratılǵan nızam joybarı Nızamshılıq palatasınıń májilisinde ekinshi oqıwda statyama-statya kórip shıǵıldı.
– Bul nızam joybarı menen ayırım nızam hújjetlerine gúmanlanıwshı, ayıplanıwshı yamasa sudlanıwshıǵa qamaqqa alıw bas sharası qollanılmaǵan, biraq Ózbekstan Respublikası Mámleketlik shegarasın tárk etip, sorastırıw, dáslepki tergew yamasa suddan keshirimli sebeplersiz bas tartıw múmkin ekenligine jeterli tiykarlar bar bolǵanda sorastırıwshı, tergewshi, prokuror yamasa sud tárepinen olardıń Ózbekstan Respublikasınan shıǵıw huqıqın waqtınsha sheklew tártibi belgilenbekte,-dedi deputat Uluǵbek Qobulov. – Sonday-aq, medicinalıq xızmet alıw yamasa jaqın tuwısqanınıń qaytıs bolǵanı sıyaqlı keshirimli jaǵdaylarda usı májbúrlew sharasın biykar etiw menen Ózbekstannan shıǵıwına ruqsat beriliwi belgilenbekte. Nızam joybarınıń qabıl etiliwi jábirleniwshiniń konstituciyalıq huqıqları menen erkinliklerin qorǵawǵa, onıń nızamlı huqıqları menen máplerine zıyan jetkeriliwiniń aldın alıwǵa xızmet etedi.
Májiliste nızam joybarınıń áhmiyetliligi atap ótilip, deputatlar tárepinen qabıl etildi.

Muhtarama Komilova, ÓzA