Mámleketimiz basshısına 21-aperl kúni investiciya tarawında usı jıl birinshi sherekte islengen jumıslar hám gezektegi tiykarǵı wazıypalar boyınsha málimleme berildi.

Mámleketimizdiń jedel sırtqı siyasatı hám qolaylı isbilermenlik ortalıǵı nátiyjesinde investiciyalar kólemi izbe-iz ósip barmaqta. Atap aytqanda, bıyılǵı jıl birinshi sherekte 8 milliard 700 million dollardan aslam sırt el investiciyaları ózlestirilip, ótken jıldıń usı dáwirine salıstırǵanda derlik 20 procentke ósti.
Bul qarjılar esabınan energetika, metallurgiya, ximiya, farmacevtika, transport, awıl hám suw xojalıǵı, kommunal hám sociallıq tarawlarda kóplegen áhmiyetli joybarlar ámelge asırılmaqta. Onda qosımsha qun hám jumıs orınların jaratıwǵa ayrıqsha itibar qaratılmaqta.
Birinshi yarım jıllıqtıń juwmaǵı menen 18 milliard dollardan aslam sırt el investiciyalarınıń ózlestiriliwi kútilmekte.
Ulıwma, 2025-jılı 42 milliard dollar sırt el investiciyası tartılıwı, 81 iri, 8 mıńnan aslam orta hám kishi joybarlar ámelge asırılıwı názerde tutılǵan.
Juwapkerlerge hár bir joybar boyınsha mánzilli islesip, barlıq ministrlik, hákimlik hám tarmaq basshıların tartıp, tiyisli máselelerdi óz waqtında sheship barıw boyınsha kórsetpeler berildi.
Házirgi kúnde dúnyada júz berip atırǵan ekonomikalıq terbelisler sharayatında hár bir investor menen jaqınnan islesip, sırt el investiciyalarınıń nátiyjeliligin arttırıw zárúr ekenligi atap ótildi. Eń tiykarǵısı – jańa investiciya joybarların tezirek iske qosıp, sanaat tarmaqların rawajlandırıw hám diversifikaciyalaw hám joqarı dáramatlı jumıs orınların jaratıw áhmiyetli ekenligi atap ótildi.

ÓzA