Úlken jarıslardıń júgi de úlken boladı. Abıraylı, dúnya itibarındaǵı chempionatlarda jeńiske erisiw, Watannıń abırayın mártlershe qorǵaw ańsat emes.

Jeńis ózinen-ózi qolǵa kirgizilmeydi. Onıń artında bárinen burın itibar, miynet, izlenis, hár tárepleme potenciallı komandanı qáliplestire biliw hám álbette, isenim jámlengen bolıwı kerek.
Futbol boyınsha U17 jas kategoriyasındaǵı Aziya kuboginde elimiz saylandı komandasınıń múnásip nátiyjege eriskeni, eki futbolshı az bolǵan halda qarsılasın finalda jeńip shıqqanı ózbek futbolı rawajlanıwdıń jańa basqıshına shıǵıp atırǵanın jáne bir márte kórsetti.
Mámleketimiz basshısı jas futbolshılarımızǵa jollaǵan qutlıqlawında atap ótilgenindey, sabır-taqatlı jaslarımızdıń pútkil turnir dawamında bir de jeńiliske ushıramastan, rekord nátiyje kórsetkeni, finalda maydan iyeleri – Saudiya Arabstanı sıyaqlı oǵada kúshli komandaǵa qarsı keskin bellesiwde on bir oyınshıǵa qarsı toǵız futbolshı menen jeńiske eriskeni haqıyqıy erlik úlgisi boldı.
Haqıyqatında da, endi ǵana 17 jas bosaǵasında turǵan náwqıran futbolshılarımızdıń chempionlıq ataǵına iye bolıwı Jańa Ózbekstannıń jańa jeńislerge qaray isenimli qádem taslap atırǵanınıń ámeldegi dálili, desek aljaspaymız.
Aziyada teńsiz bolǵan húrmetli futbolshılarımızdı kútip alıw ushın Islam Kárimov atındaǵı Tashkent xalıqaralıq aeroportında tiyisli ministrlik hám uyımlardıń wákilleri, futbol jámáátshiligi, jurnalistler, ata-analar hám tamashagóyler jıynaldı. Átirapta áne sol quwanısh,, sol temadaǵı sáwbetler qayta-qayta tákirarlanbaqta.
Búgin jas óspirim futbolshılarımızdıń jeńisi tek ǵana sport tarawı xızmetkerleri toparlarında emes, al máhállelerde, bazarlarda, kóshelerde, úlken-kishi jıyınlardıń tiykarǵı temasına aylanǵanın aytıw zárúr. Áne, bul pikirler xalqımızdı birde-bir maqset átirapına birlesiwge, keleshekke bolǵan isenimi jáne de artıwına xızmet etpekte.
… Biz kútken máwritler keldi. Saudiya Arabstanınan ushqan samolyot paytaxtımızdıń sawlatlı aeroportına kelip qondı.
Futbol boyınsha U17 jas kategoriyasındaǵı Aziya kuboginde jeńiske erisken, xalqımızdıń maqtanıshına aylanǵan Ózbekstan saylandı komandasınıń aǵzaları Watan topıraǵına qádemin qoydı.
Ata-analar, trenerler, keń jámiyetshilik wákilleri, gúl kótergen shıraylı qızlarımız, tilekles veteranlarımız, taraw pidayılarınıń júz-kózlerindegi saǵınısh, shúkirshilik, maqtanısh sezimlerin sóz benen táriyiplew qıyın.
2024-jılı elimiz Olimpiada komandası ózbek futbolı tariyxında birinshi márte Olimpada oyınlarına jollamanı qolǵa kirgizgen edi. Bıyılǵı máwsimde milliy saylandı komandamız Jáhán chempionatına shıǵıw bosaǵasına jetip keldi. Bul sátli qádemdi búgin Ózbekstan jas óspirimler saylandı komandası Aziya kuboginde dawam ettirdi. Endi onıń keyingi mánzili usı jıldıń 3-27-noyabr kúnleri Qatarda ótkeriletuǵın jáhán chempionatı bolıp tabıladı.
U17 jas kategoriyasındaǵı bul retki Aziya kubogi oyınlarınan tásirlerge toqtap ótsek, Ózbekstan saylandı komandası Tailand, Qıtay, Saudiya Arabstanı, BAÁ hám QXDR sıyaqlı saylandı komandalardı jeńip shıǵıp, finalǵa jol aldı. Keyingi sheshiwshi final bellesiwi bolsa, erlik, sabırlılıq hám Watannıń abırayı ushın gúres oyını boldı.
CHempionat dawamında óziniń kúshli oyınları menen ajıralıp turǵan Nematulla Rustamjanov – Aziya kuboginiń eń jaqsı dárwazamanı, 5 gol urǵan Asılbek Aliev – eń jaqsı hújimshi, Sadriddin Hasanov – turnirdiń eń jaqsı futbolshısı, dep tán alınǵanı da bárimizge ózgeshe maqtanısh baǵıshladı.
– Shákirtlerim kontinent chempionatında Watanımızdıń abırayın qorǵawday juwapkershilikti sezingen halda kóterińki ruwxta hám kúshli umtılıs penen oynadı, – deydi Ózbekstan jas óspirmler saylandı komandasınıń bas treneri Islam Ismoilov. – Olar pútkil dúnyaǵa elimizde fizikalıq hám ruwxıy jaqtan jetik áwlad kamalǵa kelip atırǵanın, Ózbekstan jaslarınıń dúnyada hesh kimnen kem emesligin jáne bir márte kórsetti. Pursattan paydalanıp, elimizde futbolǵa qaratılıp atırǵan úlken itibar ushın mámleketimiz basshısına, húkimetimizge minnetdarshılıq bildiremiz. Final oyını fantastikalıq oyın boldı. Jigitlerge raxmet. Olar imkansız wazıypanı atqarıp shıqtı. Sezimlerimizdi sóz benen táriyipley almaymız. Aldımızda jáne de áhmiyetli bellesiw bizdi kútpekte. Jáhán chempionatında da elimizdiń abırayın múnásip qorǵaymız.
– Biz Aziya chempionatında jeńiske erisip, xalqımızdıń isenimin aqlaw baxtına miyasar bolǵanımızdan oǵada quwanıshlımız, – deydi Ózbekstan jas óspirimler saylandı komandasınıń aǵzası Sadriddin Hasanov. – Bul nátiyje menen toqtap qalmaymız. Nesip etse, bıyıl ótetuǵın jas óspirimler arasındaǵı Jáhán chempionatında da múnásip qatnasıp, ózbek futbolınıń joqarı potencialın pútkil dúnyaǵa kórsetemiz.
Bayramǵa aylanǵan saltanatlı ilajda Ózbekstan Respublikası Bas ministri A.Aripov Ózbekstan Respublikası Prezidenti Shavkat Mirziyoevtiń futbolshılarımızǵa jollaǵan qutlıqlawın oqıp esittirdi.
Ózbekstan Respublikası Prezidenti Administraciyası departamentiniń basshısı O.Abdurahmanov Prezidentimizdiń tiyisli pármanı menen sportshılar hám olardıń treneri, futboldı úgit-násiyatlaw jolında pidayılıq kórsetip kiyatırǵan sport sholıwshıları mámleketimizdiń joqarı sıylıqları – «Ózbekstan Respublikasına xızmet kórsetken sport treneri» húrmetli ataǵı, «Kelajak bunyodkori» hám «Shuhrat» medalları menen sıylıqlanǵanın járiyaladı.
Kernay-sırnay sazları astında U17 jas kategoriyasında Aziya kuboginde elimizdiń abırayın xalıqaralıq sport maydanında ulıǵlawǵa sheksiz úles qosqan, elimiz jaslarınıń shıdamlılıǵın xalıqaralıq maydanda kórsetken Ózbekstan jas óspirmler saylandı komandasınıń trener hám futbolshılarına Prezident sawǵası – jeńil avtomobillerdiń giltleri hám mámleketlik sıylıqlar saltanatlı túrde tapsırıldı.
Isenim hám itibar jańa jetiskenliklerdiń tiykarı bolıp tabıladı. Búgin Jańa Ózbekstannıń «altın áwladı» bolǵan erjúrek futbolshılarımız xalqımızdıń mehir-muhabbatına sazawar boldı.
Úmitimiz, Aziya kuboginde jeńimpaz bolǵan jas futbolshılarımız jáhán jasıl maydanlarında ózbek futbolınıń ayqın jeńislerin támiyinleydi. Abıraylı bellesiwler bosaǵasında turǵan ármanları bir dúnya futbolshı jaslarımızǵa úlken sınaqlarda jeńisler tilep qalamız.
Saltanatlı ilajda Ózbekstan Respublikası sport ministri A.Ikramov, Milliy olimpiada komiteti baslıǵınıń birinshi orınbasarı O.Umarov, Ózbekstan futbol associaciyasınıń baslıǵı B.Qurbanov, Jaslar isleri agentliginiń direktorı A.Sadullaev, Tashkent qalasınıń hákimi Sh.Umurzaqov hám basqa da juwapkerler qatnastı.

Tulqin RWZIEV,
Javohir TAShXWJAEV,
ÓzAnıń xabarshıları