Ózbekstan Respublikası Ministrler Kabinetiniń 2020-jıl 14-dekabrdegi 781-sanlı «2020-2025-jıllarda kitapqumarlıq mádeniyatın rawajlandırıw hám qollap-quwatlaw milliy baǵdarlamasın tastıyıqlaw haqqında»ǵı hám «Respublika ulıwma orta bilim beriw shólkemlerinde málimleme-kitapxana jumısın bunnan bılay da jetilistiriw hám de kózi ázzi hám kóriwinde nuqsanı bar balalardı Brayl álipbesindegi kórkem ádebiyatlar menen támiyinlew ilajları haqqında»ǵı 2024-jıl 7-noyabrdegi 743-sanlı qararlarınıń orınlanıwın támiyinlew maqsetinde, mámleketimizdiń barlıq aymaqlarında 2025-jıldıń 21-27-aprel kúnleri aralıǵında «Ózbekstan – kitapqumarlar jurtı» súreni menen Respublikalıq «Kitapqumarlıq hápteligi»n ótkeriw belgilengen.

Usı múnásibet penen paytaxtımız Nókis qalasında «Ózbekstan – kitapqumarlar jurtı» súreni menen Respublikalıq «Kitapqumarlıq hápteligi»niń ashılıw máresimi bolıp ótti.
«Doslıq» kanalı boyındaǵı mádeniy dem alıw baǵında ótkerilgen ilajdıń ashılıw saltanatında Qaraqalpaqstan Jazıwshılar awqamınıń baslıǵı K. Karimov, Ózbekstan Respublikası Prezidenti Administraciyası janındaǵı Málimleme hám ǵalaba kommunikaciyalar agentliginiń Qaraqalpaqstan Respublikası basqarması baslıǵı B. Erejepov, Qaraqalpaqstan xalıq shayırı X. Dáwletnazarov, Qaraqalpaqstan xalıq xudojnigi S. Baybosınov hám basqalar shıǵıp sóylep, sońǵı jılları Prezidentimizdiń arnawlı qararı tiykarında elimizde kitapqumarlıqtı keńnen en jaydırıw, xalıqtıń ruwxıy dúnyasın bayıtıw, jaslardı kitap oqıw hám kórkem ónerge qızıqtırıw, olardı hár tárepleme xoshametlew baǵdarında alıp barılıp atırǵan ilajlardı atap ótip, usınday qollap-quwatlaw nátiyjesinde respublikamızdan kóplegen talantlı jasları ósip jetilisip atırǵanına ayrıqsha toqtaldı.
-Búgingi ilajda respublikamızda jaylasqan joqarı oqıw orınları studentleri menen birge, Balalar muzıka hám kórkem óner mektepleri, J.Izentaev atındaǵı qánigelestirilgen kórkem óner mektebiniń oqıwshıları hám oqıtıwshıları ózleriniń soqqan súwretleri, qol óneri buyımları, dizaynerlik kórgizbeleri menen qatnaspaqta,-deydi Ózbekstan kórkem óner akademiyası Qaraqalpaqstan bóliminiń bas ilimiy xatkeri Axmet Xojambergenov.-Háptelik sheńberinde hár qıylı mazmundaǵı ilajlar ótkerilip, onıń jeńimpazları arnawlı sıylıqlar menen xoshametlenedi. Bunday ilajlardıń ótkeriliwi talantlı oqıwshılarımızdıń sheberliginiń artıwına óziniń unamlı tásirin tiygizedi.
Sonday-aq, ilajda respublikamızdaǵı málimleme-kitapxana orayları, mámleketlik hám jeke menshik baspalar ózlerinde bar kitaplardan ibarat kórgizbeler shólkemlestirip, bul qatnasıwshılarda úlken tásirler qaldırdı.
-Súwretler kórgizbesinde maǵan J.Izentaev atındaǵı qánigelestirilgen kórkem óner mektebiniń oqıwshıları Adil Keńesbaevtıń «Qılqalı awıl», «Awıl turmısı», «Sáwbet», Fazılbek Xalilaevtıń «Qara úy qurıw», Berdaq Atabaevtıń «Baqsı qız» portretleri unadı,-deydi kórgizbe qatnasıwshısı belgili fotojurnalist Maqset Habibullaev.
«Ózbekstan – kitapqumarlar jurtı» súreni menen Respublikalıq «Kitapqumarlıq hápteligi» respublikamız boylap barlıq orınlarda keń túrde ótkerilmekte.

Adilbay Orazov,
Qaraqalpaqstan xabar agentligi sholıwshısı.
Maqset Habibullaevtıń túsirgen súwretleri.