Bozataw rayonında “Zıyanlı shegirtkelerge qarsı gúresiw hám tarqalıwınıń aldın alıw” atamasında arnawlı-taktikalıq oqıw seminarı shólkemlestirildi.

Ilajda Qaraqalpaqstan Respublikası Ósimlikler karantini hám qorǵaw agentligi, Shegirtke hám tut gúbelegine qarsı gúresiw xızmeti, Ayrıqsha jaǵdaylar basqarması, Ósimlikler karantini hám onı qorǵaw ilimiy-izertlew institutı Qaraqalpaqstan Respublikası filialı, Densawlıqtı saqlaw ministrligi, Veterinariya hám sharwashılıqtı rawajlandırıw komiteti hám Bozataw rayonı hákimliginiń wákilleri qatnastı.
Ilaj eki basqıshta ótkerilip, teoriyalıq hám ámeliy bólimlerden ibarat boldı.
Birinshi basqıshta zıyanlı shegirtkelerdiń tarqalıw jaǵdayı hám ótkeriletuǵın profilaktikalıq ilajlar, zıyanlı shegirtkelerge qarsı gúresiwde qollanılatuǵın preparatlar menen adamlar yamasa haywanlar záhárlengende birinshi medicinalıq járdem kórsetiw usılları, zıyanlı shegirtkelerge qarsı kompleksli ilajlar haqqında maǵlıwmatlar berildi.
Ekinshi basqıshta bolsa zıyanlı shegirtkelerge qarsı ámeliy shınıǵıwlar alıp barıldı.
Qaraqalpaqstan Respublikasında zıyanlı shegirtkelerdiń rawajlanıwı hám tarqalıwına qolaylı 3 million gektardan aslam jer maydanı bolıp, ótken jılǵı gúzgi baqlaw nátiyjeleri boyınsha 112 mıń gektar jer maydanında zıyanlı shegirtkeler tárepinen máyek qoyılǵanı anıqlandı.
Maǵlıwmat ushın, 2024-jıldıń juwmaǵı boyınsha 94 mıń 200 gektar maydanda zıyanlı shegirtke oshaqlarına qarsı ximiyalıq qayta islew jumısları ótkerilgen. Bıyılǵı ximiyalıq qayta islew jumısları respublika aymaǵında tarqalıw waqtın esapqa alıp, may ayınan baslanadı.

Qaraqalpaqstan xabar agentligi