Qaraqalpaqstan Respublikası Ósimlikler karantini hám qorǵaw agentliginiń shólkemlestiriwinde «Elimizde awıl xojalıǵı ónimleriniń eksportlıq potencialın arttırıw perspektivaları» atamasında eksportshı kárxanalardıń wákilleri hám isbilermenlerdiń qatnasıwında ashıq sáwbetlesiw bolıp ótti.

Onda Ózbekstan Respublikası Ósimlikler karantini hám qorǵaw agentliginiń direktorı I.Ergashev, Qaraqalpaqstan Respublikası Ósimlikler karantini hám qorǵaw agentliginiń baslıǵı R.Sherbaev, Ózbekstan Sawda-sanaat palatası Qaraqalpaqstan Respublikası basqarması baslıǵınıń orınbasarı M.Kosnazarov, Bajıxana basqarması wákilleri, awıl xojalıǵı ekportı menen shuǵıllanıwshı kárxana basshıları, diyqan-fermerler hám isbilermenler qatnastı.
Ilajdı ótkeriwden maqset – awıl xojalıǵı ónimlerin eksportqa shıǵarıwshı isbilermenlik subektlerin mámleketimiz tárepinen belgilep berilgen jeńillikler hám qolaylıqlar menen tanıstırıw, mashqala hám tosqınlıqlardı anıqlaw hám sheshiw, olardıń pikir-usınısların tıńlaw, sonday-aq, Ózbekstan Respublikası Prezidentiniń 2025-jıl 8-apreldegi «Awıl xojalıǵı ónimleriniń eksportlıq potencialın arttırıw hám qayta islew shınjırın rawajlandırıw boyınsha qosımsha ilajlar haqqında»ǵı qararınıń mazmun-mánisin túsindiriwden ibarat.
Sonday-aq, ilajda Ózbekstan Respublikası Ministrler Kabinetiniń 2024-jıl 29-fevraldaǵı “Respublikada miywe-palız ónimleriniń eksportın tártipke salıw ilajları haqqında”ǵı qararında belgilengen miywe-palız ónimleriniń eksport bahaların jasalma túrde tómenletiw jaǵdaylarınıń aldın alıw, miywe-palız ónimlerin jetistiriw hám olardı eksportqa shıǵarıwda Ósimlikler karantini hám qorǵaw agentliginiń “Agroko‘makchi” mobil qosımshasında jaratılǵan qolaylıqlar hám onnan paydalanıw haqqında maǵlıwmatlar berilip, qadaǵalaw uyımlarınıń qánigeleri tárepinen miywe-palız hám azıq-awqat ónimlerin eksport etiwdegi talaplar óz baǵdarları boyınsha túsinikler berildi. Atap aytqanda, miywe-palız hám azıq-awqat ónimlerin eksportqa shıǵarıwda olardıń qadaqlawına, sapasına hám kalibrlenetuǵınına ayrıqsha toqtap ótildi.
Prezident qararında 2025-2026-jıllarda awıl xojalıǵı ónimleriniń eksportın arttırıw hám qosımsha qun shınjırın jaratıwdıń tiykarǵı maqsetli kórsetkishleri belgilengen.
Atap aytqanda, 2025-jılı miywe-palız hám azıq-awqat ónimleriniń eksport kólemin jámi 3,5 milliard AQSh dollarına jetkeriw, 2025-jıldıń aqırına shekem 8 mámleketke jańa 30 túrdegi ónimlerdiń eksportı ushın fitosanitariyalıq ruxsatnamalardı alıw, perspektivalı bazarlarǵa 2025-jılı 442 million AQSh dolları, 2026-jılı 575 million AQSh dolları muǵdarındaǵı miywe-palız ónimleriniń eksportın támiyinlew, sonday-aq, 2025-jılı aymaqlarda jámi 2,1 million tonna miywe-palız ónimleri ushın qadaqlar islep shıǵarıw boyınsha 40,5 million AQSh dolları muǵdarındaǵı investiciyalıq joybarlardı ámelge asırıw belgilengen.
Eksportyorlar tárepinen miywe-palız hám azıq-awqat ónimlerin eksport etiwdegi mashqalaları tıńlanıp, taraw qánigeleri tárepinen óz baǵdarları boyınsha berilgen sorawlarǵa juwap berildi hám qosımsha usınıslar bildirildi.
Qaraqalpaqstan Respublikasınıń ayırım túrdegi ónimler eksportınıń 2025-2026-jıllardaǵı perspektivalı kórsetkishleri sıpatında másh, pomidor, qawın, ǵarbız hám geshir sıyalı ónimler qurap, olardıń ekportı Qıtay, Pakistan, Yaponiya, Qubla Koreyaǵa, Evropa, Arab mámleketleri hám basqa da mámleketlerge ámelge asırılıwı belgilengen. Bul arqalı 2025-jılı 6 million 651,2 mıń AQSh dolları, al 2026-jılı 8 million 646,5 mıń AQSh dollarına jetkeriw prognoz etilmekte.

Á.Jiyemuratov,
Qaraqalpaqstan xabar agentligi