Usı jıl 18-apreldegi «Óndiris, eksport hám isbilermenlik jumısın xoshametlew, sawda hám sanaat siyasatınıń nátiyjeliligin arttırıw ilajları haqqında»ǵı Prezident pármanı menen azıq-awqat ónimleri qáwipsizligin qadaǵalaw boyınsha wákillikli uyım wazıypaları Sanitariya-epidemiologiyalıq tınıshlıq hám jámiyet salamatlıǵı komiteti tárepinen ámelge asırılatuǵın boldı, dep xabar beredi xs.uz.

Onda 2025-jıl 1-avgusttan azıq-awqat ónimleri ushın texnikalıq reglamentler hám standartlardıń májbúriy ekenligi biykar etiledi hám Komitet tárepinen islep shıǵılǵan sanitariya qaǵıydaları, normaları hám gigiena normativleri tiyisli ministrlik hám uyımlar menen kelisilgennen soń tikkeley ámel etedi.
Sanitar, fitosanitar hám veteraniriya qadaǵalawı tarawındaǵı tómendegi tártip-qaǵıydalarǵa májbúriy ámel etiw 2025-jıldıń juwmaǵına shekem talap etilmeydi, sonıń ishinde:
– jergilikli hám import azıq-awqat ónimleri ushın sanitariya hám epidemiologiya xızmetleriniń laboratoriyaları nátiyjelerine tiykarlanıp sanitariya-epidemiologiyalıq juwmaq alıw arqalı sertifikatlaw;
– barlıq túrdegi azıq-awqat ónimleri, sonıń ishinde, balalar awqatları, terapevtikalıq hám profilaktikalıq awqatlanıw ushın dieta azıq-awqat qosımshaları hám jańa receptler yamasa jańa texnologiya tiykarında jaratılǵan azıq-awqat ónimleri ushın barlıq texnikalıq hújjetlerdi Densawlıqtı saqlaw ministrligi menen kelisiw hám tastıyıqlaw;
– ósimlik ónimleri, gezleme, iyirilgen jip, bılǵarı, oyınshıqlar, sport inventarı hám basqalar ushın veterinariya sertifikatın alıw.

Qaraqalpaqstan xabar agentligi