Ózbekstan parlament delegaciyası Sankt-Peterburg qalasında Ǵárezsiz Mámleketlerdiń Doslıq awqamı (ǴMDA)na aǵza mámleketler Parlamentleraralıq assambleyası (PA) ilajlarında qatnaspaqta.

ǴMDA PA keńesiniń májilisinde Keńes baslıǵı, Rossiya Federaciyası Federal Májilisi Federal Keńesi Baslıǵı V.Matvienko Parlamentleraralıq Awqam (PA)nıń Tashkent qalasında ótkerilgen 150-yubiley Assambleyası hám onıń nátiyjelerine toqtap ótti. Usı ánjumannıń joqarı dárejede shólkemlestirilgeni, qabıl etiwshi táreptiń miymanlardı qabıl etiw hám ilaj ótkeriwdegi joqarı sheberligi hám juwapkershiligin ayrıqsha atap ótti.
Senat Baslıǵı T.Norboeva assambleyada ǴMDA mámleketleri parlamentlik delegaciyalardıń belsene qatnasıwı, olardıń qabıl etilgen hújjetlerge qosqan úlesi hám alǵa qoyǵan usınısları úlken áhmiyetke iye ekenin atap ótti. Sonday-aq, keleshekte de bunday iri xalıqaralıq ánjumanlardı ótkeriwde birge islesiwge bárqulla tayar ekenin ayrıqsha atap ótti.
Soń kún tártibindegi máseleler kórip shıǵıldı. Qatnasıwshılar ǴMDA PA xalıqaralıq baqlawshıları Belarus Respublikası Prezidentiniń saylawı hám Tajikstan parlament saylawı monitoringiniń nátiyjelerine itibar qarattı.
ǴMDA PA missiyasınıń koordinatorı, Oliy Majlis Senatı Sud-huqıq máseleleri hám korrupciyaǵa qarsı gúresiw komitetiniń baslıǵı A.Eshmurodov 2025-jıl 2-mart kúni Tájikstan parlamentine bolıp ótken saylawdı baqlaw nátiyjeleri haqqında maǵlıwmat berdi.
Keńes májilisinde ǴMDA PAnıń 2024-jıldaǵı jumısı esap-sanaq etilip, keleshekte ótkeriliwi rejelestirip atırǵan xalıqaralıq sammitlerge tayarlıq máseleleri dodalandı.

***

ǴMDA PA sheńberinde Ózbekstan Senatı Baslıǵı Tanzila Norboeva Ázerbayjan Milliy Májilisi Baslıǵı Sahiba Gafarova menen ushırastı.
Tárepler Ózbekstan-Ázerbayjan qatnasıqlarınıń jedel rawajlanıwı eki mámleket basshılarınıń bekkem doslıǵı hám óz-ara isenimine tiykarlanǵanın atap ótti.
PAnıń 150-yubiley Asssambleyasınıń juwmaqlarına ayrıqsha itibar qaratıldı. Bul keń kólemli ánjuman Ózbekstan Prezidenti Shavkat Mirziyoevtiń baslaması hám xalıqaralıq kólemde keń qollap-quwatlanǵanı sebepli ótkerilgeni atap ótildi.
Ázerbayjan tárepine Qosılmaw háreketi Parlament tarmaǵınıń Bandung ruwxınıń 70 jıllıǵına baǵıshlanǵan konferenciyası shólkemlestirilgeni ushın minnetdarshılıq bildirildi.
Birinshi Ózbekstan-Ázerbayjan parlament hayal-qız aǵzaları forumına tayarlıq jumısları da dıqqat orayında boldı. Bul forumdı shólkemlestiriw boyınsha doslıq toparın dúziwge kelisip alındı. Ózbekstan tárepinen Forum koncepciyası hám gender teńlik, bilimlendiriw, hayal-qızlar isbilermenligi, turizm hám jaslar parlamentleriniń birge islesiwin qamtıp alǵan panel sessiyalarınıń temaları usınıs etildi.
Ushırasıw juwmaǵında tárepler parlamentleraralıq birge islesiwdi jáne de bekkemlew, eki tárepleme birge islesiw kún tártibin keńeytiw hám xalıqaralıq parlament strukturaları sheńberinde muwapıqlastırıwǵa tayar ekenligin tastıyıqladı.

***

Senat Baslıǵı Tanzila Norboeva Tájikstan Respublikası Májilisi milliy Májilisi Joqarı Baslıǵı Rustami Emomali menen ushırasıw ótkerdi.
T.Norboeva R.Emomalidi Tájikstan Respublikası parlamenti basshısınıń lawazımına saylanǵanı menen qutlıqlap, kelesi dáwirde de eki mámlekettiń nızam shıǵarıwshı uyımları arasında joqarı dárejedegi birge islesiw hám tıǵız qatnasıqlar jáne de bekkemlenetuǵınına isenim bildirildi.
Sáwbetlesiw dawamında eki tárepleme birge islesiwdiń áhmiyetli máseleleri dodalanıp, Ózbekstan-Tájikstan strategiyalıq sherikliktiń bekkem tiykarı eki mámleket basshılarınıń tıǵız birge islesiwi hám óz-ara isenimniń joqarı dárejesi tiykarında qáliplesip atırǵanı atap ótildi.
Parlamentlerdiń jańa quramı qálipleskeni múnásibeti menen parlamentlearalıq birge islesiwdi jedellestiriw rejeleri dodalandı. Tárepler joqarı dárejede erisilgen kelisimlerdiń orınlanıwı ústinen parlamentlik qadaǵalaw máselelerin kún tártibine kirgizgen halda «Ózbekstan – Tájikstan» doslıq toparı májilisin ótkeriwge tayar ekenligin tastıyıqladı.
Ushırasıw juwmaǵında tárepler eki dos mámleket arasındaǵı parlamentleraralıq sóylesiwdi bekkemlew hám hár tárepleme sheriklikti tereńlestiriw niyetinde ekenligin tastıyıqladı.

Norgul Abduraimova, ÓzA