Oliy Majlis Senatınıń Baslıǵı Tanzila Narboeva Sankt-Peterburg qalasında Belarus Respublikası Milliy Majlisi Respublikalıq Keńesiniń Baslıǵı Natalya Kochanova menen ushırasıw ótkerdi.

Ushırasıw barısında parlamentleraralıq birge islesiwdiń búgingi jaǵdayı hám perspektivaları, sonday-aq, Ózbekstan parlament delegaciyanıń usı jıl avgust ayında Belarustıń Vitebsk wálayatına bolajaq rásmiy sapar etiwine tayarlıq kóriw máseleleri dodalandı.
Sáwbet dawamında bolajaq ilajlardıń shólkemlestiriw hám mazmun tárepleri hár tárepleme kórip shıǵıldı. Atap aytqanda, eki mámleket jergilikli hákimiyat wákilleri uyımlarınıń qatnasıwında aymaqlararalıq forum, úshinshi Ózbekstan – Belarus hayal-qızlar biznes-forumı, jaslar parlamentleriniń májilisin ótkeriw haqqında sóz boldı.
Tárepler eki mámleket aymaqları, isbilermen toparları, jaslar hám jetekshi hayal-qızlardı bunnan bılay da birlestiriwge qaratılǵan bul ilajlarǵa tayarlıq kóriw hám ótkeriw procesinde óz-ara birge islesiwge tayar ekenin bildirdi.
Mádeniy-gumanitarlıq birge islesiw, bilimlendiriw tarawındaǵı almasıwlar, jaslar siyasatı tarawındaǵı birgeliktegi joybarlarǵa ayrıqsha itibar qaratıldı. Ózbekstan «Eslew poezdı» hám «Doslıq awqamı balaları» xalıqaralıq baǵdarlamalarında qatnasatuǵının tastıyıqlap, bul baslamalar xalıqlar arasında doslıqtı bekkemlew hám tariyxıy eslewlerdi saqlap qalıwda ayrıqsha áhmiyetke iye ekenligin atap ótti.
Xalıqaralıq shólkemler sheńberindegi birge islesiw, sonıń ishinde, saylawlardı ótkeriw hám baqlaw missiyalarına qatnasıw boyınsha tájiriybe almasıw máseleleri de dodalandı.
Ushırasıw juwmaǵında parlamentleraralıq birge islesiw potencialın saqlap qalıw hám barlıq dárejelerde erisilgen kelisimlerdi ámelge asırıw zárúrligi atap ótildi.