Samarqand qalasında Oraylıq Aziya mámleketleri Qáwipsizlik keńesleri xatkerleriniń ekinshi ushırasıwı bolıp ótti.
Ózbekstan Respublikası Prezidenti janındaǵı Qáwipsizlik keńesi xatkeri Viktor Mahmudovtıń basshılıǵında ótken májiliste Qazaqstan Respublikası Qáwipsizlik keńesi xatkeri Gizat Nurdauletov, Qırǵız Respublikası Qáwipsizlik keńesi xatkeri Marat Imanqulov, Tájikstan Respublikası Qáwipsizlik keńesi xatkeri Yusuf Rahmon, Túrkmenstannıń Ózbekstandaǵı elshixanası áskeriy attashesi Meylis Annaberdiev qatnastı. Ózbekstan Respublikası Prezidenti Shavkat Mirziyoevtiń forum qatnasıwshılarına múrájatın V.Mahmudov oqıp esittirdi.
Mámleketimiz basshısı óz múrájatında Oraylıq Aziya búgin óz rawajlanıwınıń pútkilley jańa basqıshına qádem qoyıp atırǵanı, doslıq qońsıshılıq, óz-ara isenim hám konstruktivlik sóylesiw principlerine tiykarlanǵan strategiyalıq sheriklik regionına aylanıp atırǵanın ayrıqsha atap ótken.
Atap ótiliwinshe, Oraylıq Aziya mámleket basshıları Másláhát ushırasıwında Ózbekstannıń baslaması menen qáwipsizlik hám sawda-ekonomikalıq baylanısların bekkemlew, transport baylanısların keńeytiw, aldımızda turǵan áhmiyetli máselelerdiń turaqlı sheshimlerin birgelikte izlewge qaratılǵan regionallıq sheriklik kún tártibi alǵa qoyıladı.
Sonday-aq, Shavkat Mirziyoev Qáwipsizlik keńesleri xatkerleriniń ushırasıwları ulıwma shaqırıq hám qáwip-qáterlerdi ashıq dodalaw, mashqalalarǵa óz-ara isenimge tiykarlanǵan ortalıqta birgelikte sheshimler islep shıǵıw hám «saatlardı tuwrılap alıw» ushın nátiyjeli platforma bolıp xızmet etip atırǵanın joqarı bahalaǵan.
Ushırasıwda regionallıq qáwipsizlik, terrorizm, ekstremizm hám radikallasıw, transmilliy shólkemlesken jınayatshılıqqa qarsı birgelikte gúresiw, regionda ekologiyalıq qáwipsizlikti támiyinlew, transport hám tranzit imkaniyatın rawajlandırıw, sonday-aq, transport qáwipsizligin támiyinlew boyınsha birgeliktegi háreketler sıyaqlı keń kólemli máseleler dodalandı.
Delegaciyalar basshıları regionda qáwipsizlik hám turaqlı rawajlanıwdı támiyinlew, uyımlararalıq baylanıslardı keńeytiw, sonıń ishinde, shártnamalıq-huqıqıy bazanı bekkemlew hám birge islesiw mexanizmlerin rawajlandırıw boyınsha ámelge asırılıp atırǵan jumıslar, sonday-aq, óz-ara tájiriybe hám ámeliyat almasıwı tarawındaǵı konstruktivlik sherikliktiń házirgi dárejesin joqarı bahaladı.
Tárepler regionallıq qáwipsizlik máseleleri boyınsha kózqaras hám poziciyalardıń uqsaslıǵın atap ótip, birgeliktegi háreketlerdi muwapıqlastırıw, eń áhmiyetli máselelerge sheshimler islep shıǵıw procesinde Qáwipsizlik keńesleri xatkerleriniń ushırasıwları mexanizmi úlken áhmiyetke iye ekenin atap ótti. Májilis kún tártibine kirgizilgen máseleler boyınsha birge islesiwdiń jedellesiw pátin saqlap qalıw, potencial hám imkaniyatlardan tolıq paydalanıw zárúr ekenligi maqullandı. Eki hám kóp tárepleme birge islesiwdi jáne de jetilistiriw boyınsha jańa baslama, usınıslar alǵa qoyıldı.
Forum sheńberinde qatnasıwshılarǵa 2024-jıl 9-avgust kúni Astana qalasında bolıp ótken Oraylıq Aziya mámleketleri basshılarınıń Másláhát ushırasıwında Ózbekstan Prezidenti tárepinen alǵa qoyılǵan baslama tiykarında Regionallıq qáwipsizlik hám turaqlılıqtı támiyinlew koncepciyası joybarı usınıldı.
Bunnan tısqarı, abıraylı miymanlar ushın Oraylıq Aziya xalıqaralıq institutınıń «Regionallıq tatıwlıq – Oraylıq Aziya turaqlı rawajlanıwınıń tiykarǵı faktorı» temasındaǵı ekspertlik-analitikalıq esabatı tanıstırıldı.
Ushırasıw sońında dodalanǵan tiykarǵı tarawlardı birge islesiwdi jáne de rawajlandırıw boyınsha anıq ilajlar ámelge asırılıwın názerde tutıwshı Oraylıq Aziya mámleketleri Qáwipsizlik keńesleri xatkerleri ekinshi májilisiniń Bildiriwi qabıl etildi.
Ǵ.Hasanov, A.Isroilov (súwret), ÓzAnıń xabarshıları