Qaraqalpaqstan Respublikası Bajıxana basqarması Kontrabandaǵa qarsı gúresiw bóliminiń xızmetkerleri tárepinen Mámleketlik qáwipsizlik xızmeti, Ishki isler hám Milliy gvardiya xızmetkerleri menen birgelikte Taqıyatas rayonında qoldan jasalma usılda islep shıǵarılǵan qálbeki pul birliklerin aylanısqa kirgizbekshi bolǵan jınayıy topardıń háreketleri ashıldı.
Operativ ilaj dawamında puqara 200, 100, 50 hám 20 mıńlıq kupyuradaǵı jámi 7 million 500 mıń muǵdarındaǵı qálbeki ózbek sumın 2,5 mln.lıq haqıyqıy ózbek sumı kupyurasına satıp atırǵan waqtında, ilaj qatnasıwshıları tárepinen qolǵa alındı.
Ilaj dawam ettirilip, usı puqaranıń kórsetpesine tiykarlanıp, jınayatqa baylanıslılıqta gúmanlanǵan shaxslardıń turaq jayları kózden ótkerilgeninde, qálbeki pul birliklerin islep shıǵarıwda qollanılatuǵın noutbuk, reńli printer, hár qıylı ólshemdegi qayshı hám sızǵısh buyımları ayǵaqlı dálil sıpatında alındı.
Álbette, qoldan basıp shıǵarılıp atırǵan pullar, puldı qadaǵalawdıń páseyiwine, mámleket ekonomikasına tásir kórsetip, inflyaciyanıń joqarılawına sebepshi boladı.
Bul jaǵday boyınsha basqarma tárepinen qılmısqa baylanıslı 8 shaxsqa Ózbekstan Respublikası Jınayat kodeksiniń 176-statyası 2-bólimi menen jınayat isi qozǵatıldı.
Qaraqalpaqstan xabar agentligi.