Usı jılıdń 11-13-aprel kúnleri Túrkiya Respublikasınıń Antaliya qalasında xalıqaralıq diplomatiyalıq masshtabta joqarı tán alınǵan Antaliya diplomatiya forumı – 2025 bolıp ótti. Dástúrge bola bul forum Túrkiya Sırtqı isler ministrligi tárepinen shólkemlestirildi.

Bul abıraylı ilajǵa Ózbekstan Respublikası Oliy Majlisi Senatı Baslıǵınıń birinshi orınbasarı Sadiq Sofaev ta belsene qatnastı.
Forumnıń bıyılǵı teması «Bólinip ketken dúnyada diplomatiyanı qayta tiklew» bolıp, ol búgingi tınısh emes hám qarama-qarsılıqlarǵa bay bolǵan global ortalıqta diplomatiyanıń sheshiwshi rolin jáne bir márte dodalaw orayına alıp shıqtı.
Sadiq Safoev Forum sheńberinde ótkerilgen tiykarǵı sessiyalarda shıǵıp sóylep, Ózbekstannıń ashıq hám konstruktivlik sırtqı siyasatın, regionallıq diplomatiyanı bekkemlew baǵdarındaǵı kózqaraslardı hár tárepleme sáwlelendirdi. Sonıń ishinde, ol búgingi global qarama-qarsılıqlar fonında xalıqaralıq institutlardıń isenimliligin qayta tiklew, diplomatiya arqalı turaqlı rawajlanıwdı támiyinlew hám regionallıq jáne globallıq dárejedegi birge islesiwdi bekkemlew zárúrligin ayrıqsha atap ótti.
Ilaj dawamında Sodiq Safoev bir qatar mámleketlerdiń delegaciyaları basshıları, xalıqaralıq shólkemlerdiń wákilleri hám jekteshi ekspertler menen eki tárepleme ushırasıwlar ótkerdi. Ushırasıwlarda siyasiy birge islesiw, ekonomikalıq integraciya, jaslar diplomatiyası, ekologiyalıq turaqlılıq hám málimleme mákanında óz-ara isenimdi bekkemlewge baylanıslı máseleler dodalandı.
Antaliya diplomatiya forumı global qáwipsizlik, turaqlılıq hám tınıshlıq jolında xalıqaralıq birge islesiwdi bekkemleytuǵın áhmiyetli maydanlardan birine aylanǵan.
Ózbekstan delegaciyasınıń Forumǵa belsene qatnasıwı mámleketimizdiń regionallıq hám global masshtabtaǵı ashıq, turaqlı hám uzaq múddetli diplomatiyalıq siyasatın kórsetti.

ÓzA