Jaqın Shıǵıs regionı basılımlarınıń jazıwınsha, Al-Kuveyt qalasında «Oraylıq Aziya – Arab qoltıǵı mámleketleriniń birge islesiw keńesi» strategiyalıq sóylesiwi sırtqı isler ministrleri úshinshi ushırasıwında qatnasqan Ózbekstan sırtqı siyasat uyımınıń basshısı Baxtiyor Saidov Keńes Bas xatkeri Jasim bin Muhammed Al-Budaiviy menen ushırasqanın sáwlelendirdi.

Maqalalarda Samarqandta bolıp ótetuǵın «Oraylıq Aziya – Arab qoltıǵı mámleketleriniń birge islesiw keńesi» sammitin tabıslı shólkemlestiriw máselesi sóylesiw orayında turǵanı atap ótilgen. Sóylesiw dawamında eki region mámleketlerin birlestirip turıwshı tereń tamırlar, ulıwmalıq qádiriyatlarǵa itibar berilip, jáne de perspektivalı birge islesiw ushın bekkem tiykar jaratıw zárúrligi maqullanǵan.
Sonday-aq, 2023-2027-jıllarǵa mólsherlengen Birgeliktegi háreketler rejesi de kórip shıǵılǵan. Hújjette bir qatar baǵdarlar, atap aytqanda siyasiy hám qáwipsizlik boyınsha sóylesiw, ekonomikalıq, sawda hám investiciyalıq birge islesiw, bilimlendiriw, densawlıqtı saqlaw, mádeniyat, ǵalaba xabar quralları, jaslar hám sport tarawlarında birge islesiw kólemin keńeytiw názerde tutılǵan.
Tárepler bul reje boyınsha jumıslardı ulıwmalıq mápke baǵdarlaw boyınsha háreketti kúsheytiw zárúr ekenligin tastıyıqlaǵan.

M.Pirmatova, ÓzA