Tórtkúl rayonındaǵı 2-sanlı politexnikumda Qaraqalpaqstan Respublikası Joqarǵı Keńesiniń deputatı J.Settiev hám rayonlıq Keńes deputatları puqaralar menen ushırastı.

Onda “Ibn Sino,” “Shodlik,” “Guliston” máhálleleriniń juwapkerleri, kóshe biyleri, belsendileri hám jasları jáne tiyisli shólkemlerdiń xızmetkerleri qatnastı, – dep maǵlıwmat beredi rayon hákimligi Málimleme xızmeti bólimi.
Ushırasıwda ámelge asırılǵan jumıslar boyınsha esabat berildi.
Sonday-aq, tiyisli shólkemlerge jiberilgen deputatlıq sorawlarǵa berilgen juwaplar hám ámelge asırılıp atırǵan jumıslar haqqında maǵlıwmatlar berildi.
Ózbekstan Respublikası Prezidentiniń “2025-jılı respublika máhállelerinde qáwipsiz ortalıqtı jaratıw, huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı qararı hám “Kámbaǵallıqtı qısqartıw hám xalıqtıń turmıs abadanlıǵın arttırıw baǵdarındaǵı ilajlardı jańa basqıshqa alıp shıǵıw haqqında”ǵı pármanı tiykarında ámelge asırılıp atırǵan jumıslar dodalandı.
Ushırasıp atırǵan mashqalalar boyınsha aymaq turǵınları tárepinen múrájatlar bildirildi.
Bildirilgen múrájatlardıń sheshimi boyınsha deputatlıq qadaǵalaw jumısların alıp barıw boyınsha wazıypalar belgilep alındı.

Qaraqalpaqstan xabar agentligi