Qıtaylı shıpakerler jeti jasar balanıń denesine dúnyadaǵı eń kishkene jasalma júrekti tabıslı ornalastırdı. Bul balalar transplantaciyası tarawında úlken qádem bolıp tabıladı. Bul málimlemeni «Sinxua» agentligi tarqatqan.

– Xuajun ilim hám texnologiya universiteti Tunczi medicina kolledjine qaraslı Sexe emlewxanasında 15-aprel kúni júrek-qan tamır xirurgiyası bóliminiń baslıǵı Dun Nyango basshılıǵında ótken xirurgiyalıq operaciya tabıslı ótti, – delinedi xabarda. – Shıpakerler terminal júrek jetispewshiligi menen baylanıslı nawqaslardı emlew ushın úsh jıl dawamında islep shıǵılǵan magnitli levitaciyalı sorıǵıshtan paydalandı.
Atap ótiliwinshe, jasalma apparat balanıń júregi hám ókpe jumısın tiklewge járdem bergen. Qurılmanıń awırlıǵı tek 45 gramm, sorıǵısh aylanası 2,9 santimetr. Bul úshinshi áwlad júrek bolıp, burınǵılarına qaraǵanda bir qatar abzallıqlarǵı iye. Yaǵnıy, az energiya jumsaydı, batareyası uzaq múddet isleydi, isenimlilik asqan hám qabıl etiwshiniń dene temperaturasına ózinen-ózi beyimlesiw qábileti joqarı.
– Búgingi kúndegi tayar qurılmalardıń kópshiligi jası úlkenler ushın mólsherlengen, – deydi doktor Nyango. Salmaǵı 15 kilogrammnan az, kókirek quwısı tar balalar birazdan berli zárúr nasos joqlıǵı sebepli operaciyadan shette qalıp kiyatırǵan edi.
Qıtayda jılına júrektiń islewinde úlken mashqalası bar 40 000 ǵa shamalas bala emlewxanaǵa jatqarıladı. Olardıń 10 procenti transplantaciyaǵa mútáj. Elimizde bolsa hár jılı 100 ge shamalas usıǵan uqsaǵan operaciya islenedi.

S.Rahimov, ÓzA