7-13-aprel kúnleri Túrkiyaniń Alaniya qalasında 40 jas hám onnan joqarı jastaǵılar arasında sporttıń tennis túrinen xalıqaralıq turnir bolıp ótken edi.

Jarısta Ózbekstan saylandı komandası quramında qatnasqan jerlesimiz Saǵıydulla Qutıbaev bas sıylıqtı jeńip alıwǵa eristi. Ol final bellesiwinde rossiyalı Denis Popov penen bellesip, 6:2, 6:3 esabında jeńiske eristi.
Sonday-aq, Tashkent qalasında sambo hám jawıngerlik sambo boyınsha ótkerilgen Aziya-Okeaniya chempionatında ellikqalalı palwanımız Shaxzada Azatova jawıngerlik sambo boyınsha barlıq qarsılasların jeńip shıǵıp, altın medal iyesi bolıwǵa miyasar boldı.
Búgin bul sportshılarımız Nókis temir jol vokzalında Qaraqalpaqstan Respublikası sport ministrligi basshıları, trener-ustazlar, ata-analar hám keń jámáátshilik wákilleri tárepinen saltanatlı kútip alındı.
Ilajda Qaraqalpaqstan Respublikası sport ministri Erkinbay Qutıbaev jeńimpaz sportshılar hám olardıń trenerlerin qolǵa kirgizgen tabısı menen qutlıqlap, olardıń aldaǵı jarıslarda da jaqsı tabıslarǵa erisiwine tilekleslik bildirdi.

Adilbay Orazov,
Qaraqalpaqstan xabar agentligi sholıwshısı