Ózbekstan Respublikası Densawlıqtı saqlaw ministriniń orınbasarı F.Sharipov, Medicinalıq qamsızlandırıw basqarmasınıń baslıǵı Sh.Almardanov hám Mámleketlik medicinalıq qamsızlandırıw qorı atqarıwshı direktorınıń birinshi orınbasarı Sh.Inoyatovlar tárepinen respublikamızdaǵı medicina mákemelerinde medicinalıq qamsızlandırıw mexanizmlerin ámelge asırıwda alıp barılıp atırǵan ilajlar, olardı sanlastırıw, medicinalıq xızmetlerdiń sapası hám kólemi úyrenilgen edi.

Qaraqalpaqstan Respublikası Densawlıqtı saqlaw ministrliginde usı úyreniw nátiyjelerine baǵıshlanǵan videokonferenc baylanıs túrinde májilis ótkerilip, aymaqlardaǵı taraw basshılarınıń qatnasıwında usı máseleler hár tárepleme kórip shıǵıldı.
Ilajǵa densawlıqtı saqlaw ministrligine qaraslı barlıq rayon (qala)lıq medicina birlespeleriniń basshıları orınlardaǵı studiyalar arqalı qatnastı.
Onda tiykarǵı itibar kepillik berilgen paketke kirgizilgen 66 túrdegi dári ónimleri, medicinalıq buyımlar, materiallar, laboratoriyalıq tekseriwler ushın zárúr bolǵan reaktivlerdiń támiynatı, diagnostikalıq-analizler ushın kerekli bolǵan úskeneler menen támiyinleniw jaǵdayına qaratıldi.
Xalıqtıń densawlıǵına baylanıslı kórsetkishlerdi monitoring etiw, kesellik tariyxın júrgiziw hám medicina mákemelerine baǵdarlaw maqsetinde ámelge asırılıp atırǵan sanlastırıw processleri, tiyisli programmanıń jumısı bahalandı.
Xalıqtı bul sistemaǵa tartıw hám olardıń biypul dári ónimleri menen támiyinleniwinde bir qatar medicina mákemeleri tárepinen nemquraydılıqqa jol qoyılıp atırǵanı atap ótildi.
Májiliste keltirilgen kemshiliklerdi saplastırıw boyınsha anıq wazıypalar belgilendi.

Qaraqalpaqstan xabar agentligi