Shınında da, Aral teńiziniń qurıwı region ushın úlken ekologiyalıq apatshılıq alıp keldi. Óz waqtında ol átirapındaǵı xalıqqa qosımsha Ekinshi jer júzilik urıs dáwirinde pútkil awqam xalqın azıq-awqat penen támiyinlewge elewli úles qosqan. Aral átirapındaǵı xalıq ashlıqtıń ne ekenin bilmegen.

Biraq, búgingi kúnde bul jerde qurıǵan teńizdiń baylıǵı esaplanǵan artemiya cistası yaki ultanda toplanıp qalǵan duz kánleri, payda bolǵan keń jazıq jaylaw xalıq mápi ushın iske qosılmaqta.
Búgingi kúnde “Moynaq mineral duzı” JShJ tárepinen islep shıǵarılıp atırǵan ekstra kategoriyalı duzlar tek ǵana mámleketimiz boylap emes, al Qazaqstan bazarlarına da jol almaqta. Jaqında usı Moynaq duz zavodınıń jańa quwatlılıǵı iske qosıldı.
– Zavodta hár ayda 2800-3000 tonna duz ónimi islep shıǵarılmaqta,-deydi Moynaq rayonı hákiminiń orınbasarı – investiciyalar hám sırtqı sawda bóliminiń baslıǵı Quralbay Xojalepesov.
Kárxananıń jumısı sebepli 100 den aslam jergilikli puqaralar jumıs penen támiyinlendi, olar ushın zamanagóy hám qolaylı jumıs sharayatları jaratıldı. Duzdı qaplaw ushın zárúr bolǵan qaltalar da zavod janınan shólkemlestirilgen tigiw cexındaǵı hayal-qızlarımız tárepinen tigilmekte. Bul da xalıqtıń bántligi ushın qosımsha jumıs.
Biz tek usı kárxana menen toqtap qalǵanımız joq. Házirgi waqıtta Qońırat rayonındaǵı “Barsa kelmes” duz káni janında jańa filial qurılıp, xalıqtıń jumıs penen támiyinleniwi ushın jáne bir imkaniyatlar esigi ashılmaqta.
Awa, Aral teńizi sheginip atırǵan bolsa da, ele xalıqtı azıqlandırıp atır. Bul da aymaq turǵınlarınıń ırısqı-nesiybesi.

Á.Jiyemuratov,
Qaraqalpaqstan xabar agentligi