2025-jıldıń 1-sentyabrinen baslap Ózbekstanda hár bir qurılıp atırǵan obekt ushın QR-kodlı pasport engiziledi. Bul haqqında Ádillik ministrligi xabar berdi.

Bul sistema arqalı qala qurılısı subektleri, qurılıs múddetleri, hújjetler hám ekspertiza juwmaqları sıyaqlı áhmiyetli maǵlıwmatlarǵa tezirek iye bolıw múmkin boladı.
Bunnan tısqarı, kóp kvartiralı turaq jaylarda orınlar hám podvallardı qayta qurıw yamasa rejelestiriwde qurılıs normaların buzǵan halda konsruktivlik bólekler hám tayanısh diywallardı ózgertiw, buzıw yamasa imarattıń jer silkiniwge shıdamlılıǵına unamsız tásir etetuǵın háreketler qatań qadaǵan etiledi.
1-iyulden baslap ishimlik suwı hám aqaba suw sisteması obektlerin májbúriy texnologiyalıq auditten ótkeriw, qurılıs hám turaq jay kommunallıq xojalıǵı tarawında mámleketlik qadaǵalawdı ámelge asırıwda mobil videokameralar hám arnawlı planshetlerden paydalanıw sıyaqlı tártipler engiziledi.
Sonday-aq, basqıshpa-basqısh aymaqlıq inspekciyalarda qurılıs obektlerin onlayn baqlaw orayı shólkemlestiriledi hám tájiriybe-sınaq túrinde 2025-jılı Qashqadárya wálayatındaǵı Mámleketlik byudjet qarjılarınıń esabınan jańadan qurılatuǵın obektlerge videokameralar ornatıladı.

Qaraqalpaqstan xabar agentligi