Prezident Shavkat Mirziyoev Ándijan wálayatın kompleksli rawajlandırıw boyınsha tiykarǵı wazıypalar boyınsha májilis ótkermekte.

Ándijan hámme tarawda reformalardıń orınlanıwına kirisip, adamlardıń kúndelikli turmısına unamlı ózgerislerdi tez alıp kirip atırǵan aymaqlardan biri ekeni atap ótildi.
Ótken jılı wálayatta 4 mıńnan aslam jańa isbilermen jumıs basladı, 51 kárxana kishiden orta kategoriyaǵa ótti, 13i irilesti. Bir jılda 450 mıń xalıq jumıslı boldı.
Wálayatta 1,5 million kvadrat metr turaq jay hám 850 mıń kvadrat metr turaq jay emes obektler boy tikledi. Onıń esabınan ótken jılı sawda hám xızmetler 13 procentke, sanaat 7,5 procentke arttı.
«Biraq, ómir bir jerde toqtap qalmaydı. Adamlar hár kúni izlenip, jańa ideya hám baslamalar menen shıqpaqta, aldımızǵa úlken máselelerdi qoymaqta», – dedi Prezident.
Usını esapqa alıp, wálayatqa qosımsha 1 trillion sum qaratılatuǵını aytıldı.
Wálayat hákimligi, wálayat shólkemleri basshıları, 16 qala hám rayon hákimleri xalıq hám isbilermenlerdi hár kúni tıńlap, házirgi pátti saqlap qalıw shárt ekenligi kórsetip ótildi.
«Dúnyada búgingi ekonomikalıq terbelisler sharayatında hár bir hákim ayrıqsha juwapkershilikti alıwı zárúr», – dedi mámleketimiz basshısı.

ÓzA