Xojeli rayonındaǵı 6-sanlı ulıwma bilim beriw mektebinde mámleketlik ǵayratker Pirjan Xalmuratovtıń 100 jasqa tolıwı múnásibeti menen “Eldiń atın – er shıǵaradı” atlı ilaj bolıp ótti.

Oǵan P.Xalmuratov penen birge islesken nuraniylar, jámiyetshilik wákilleri, perzentleri qatnastı.
Atap ótilgenindey, Pirjan Xalmuratov 1925-jıldıń 1-yanvarında Końırat rayonınıń Qanlıkól awılında (házirgi «Kindik ózek» shirketler birlespesi) tuwılǵan. 1932-1936-jılları awıllıq baslawısh mektepti, sońınan Qońırattaǵı orta mekteptiń jetinshi klassın pitkerip, Xojeli ped.uchiliщesinde bilim aldı. 1942-1946-jılları Qońırat rayonındaǵı mekteplerde muǵallim, direktor bolıp isledi.
1950-jılı Tashkent yuridika institutın pitkerip, sol jıldıń ózinde Qaraózek rayonına prokuror etip tayınlandı. Aradan kóp waqıt ótpey-aq Nókis qalasınıń prokurorı, rayonlardıń irileniwine baylanıslı Xojeli rayonlar aralıq prokurorı, Qaraqalpaqstan Ishki isler ministriniń orınbasarı bolıp isledi. 1962-jılı Kegeyli rayonlıq partiya komitetiniń birinshi xatkeri etip saylandı. 1973-jılı respublika basshıları Pirjan Xalmuratovtı Xojeli rayonına basshı etip bekitti. Onıń tınımsız miynetleriniń arqasında Xojeli rayonı sociallıq-ekonomikalıq jaqtan hár tárepleme rawajlanıp, xalıqtıń turmıs jaǵdayı ádewir kóterildi. Rayonda iri qurılıslar qolǵa alınıp, mektepler, bilim jurtlardıń imaratları, miymanxana, húkimet úyi, oraylıq emlewxana, baylanıs úyi, kóp qabatlı turaq jaylar salındı.
Ilajda P.Xalmuratov penen birge islesken nuraniylar da shıǵıp sóylep, ol haqqında jaqsı pikirlerin bildirip, jaslarǵa bahalı másláhátlerin berdi.
Ilaj oqıwshılardıń atqarıwındaǵı saxnalıq kórinisler, ayaq oyınlar menen dawam etti.

Qaraqalpaqstan xabar agentligi