Búgin, 15-aprel kúni Berdaq atındaǵı Qaraqalpaq mámleketlik universitetinde “Ózbekstan – kóp milletli tatıw shańaraq”, atamasında festival bolıp ótti. Onda Qaraqalpaqstan Respublikası Ministrler Keńesi Baslıǵınıń orınbasarı R.Nurazizov, universitettiń professor-oqıtıwshıları menen student-jasları, sonday-aq, Namangan mámleketlik texnika universiteti hám Úrgensh mámleketlik universitetlerinen delegaciyalar qatnastı.

Dáslep miymanlar studentler tárepinen islengen milliy kiyimler, qol óneri úlgileri, súwretler kórgizbelerin tamashaladı.
Ilajdı Berdaq atındaǵı Qaraqalpaq mámleketlik universitetiniń rektorı A.Reymov kiris sóz benen ashtı. Festivalda shıǵıp sóylewshiler Prezidentimizdiń basshılıǵında milletler aralıq tatıwlıqtı bekkemlew, xalıqlar arasında óz ara awızbirshilikti támiyinlew, keńpeyillik hám miyrim-shápáát ortalıǵın ele de kúsheytiwge ayrıqsha itibar qaratılıp atırǵanlıǵın sonday-aq, búgingi kúnde Ózbekstan óziniń bekkem tariyxıy miyrası, bay mádeniyatı hám xalıqaralıq baylanısları menen tek ǵana Oraylıq Aziyada emes, al pútkil dúnyadaǵı áhmiyetli mádeniy hám siyasiy oraylardan birine aylanıp atırǵanlıǵı, «Jańa Ózbekstan» degen túsinik tek ǵana mámleketimizdiń jańa siyasiy sistemasın emes, al xalqımızdıń jańa doslıq hám mádeniyatqa bolǵan kózqarasın da bildiretuǵınlıǵın aytıp ótti.
Túrli milletler arasındaǵı miyrim-shápáát, óz-ara húrmet hám awızbirshilikti bekkemlew baǵdarında kóplegen reformalar ámelge asırılmaqta. Bul biykarǵa emes. Ózbekstan rawajlanıwınıń tiykarı – bul turaqlılıq, tınıshlıq hám xalıqlar arasındaǵı doslıq bolıp esaplanadı. Mine, usınday ortalıqta jasap atırǵan hár bir insan óz potencialın tolıq júzege shıǵarıwı, keleshekke isenim menen qarawı múmkin. Festivaldıń eń qızıqlı bólimi jaslardıń qatnasıwında bolıp ótti. Studentler ózleriniń atqarıp shıqqan saxnalıq kórinislerinde doslıq, tınıshlıq, awızbirshilik sıyaqlı iygilikli ideyalardı úgit-násiyatlap, elimizdiń rawajlanıwına xızmet etiwge tayar ekenliklerin kórsetti. Álbette, bunday ilajlar tek ǵana jaslardıń qálbinde milletleraralıq tatıwlıq, watansúyiwshilik hám adamgershilik sezimlerin bekkemlep qoymastan, al Ózbekstannıń xalıqaralıq maydandaǵı unamlı kelbetin qáliplestiriwde de áhmiyetli orın iyeleydi.
Bul festival elimizde jasap atırǵan hár bir millet wákiliniń ana jurtı – Ózbekstan qushaǵında qanshelli erkin hám tınısh ómir súrip atırǵanın jáne bir márte kórsetti. Sonday-aq, qatnasqan miymanlar, student-jaslar hám jámiyetshilik wákilleri elimizde 130 dan aslam millet hám xalıq wákilleri bir shańaraqtıń perzentlerindey tatıw jasap atırǵanınlıǵı ráńbá-ráń mádeniy ilajlarda óz kórinisin tapqanlıǵınıń gúwası boldı. . Olardıń hár biri óziniń biytákirar mádeniyatı, úrp-ádet hám dástúrleri menen elimizdiń ráńbáreń mádeniy kórinisine óz úlesin qosıp kelmekte. Ózbekstan dúnyadaǵı az sanlı mámleketlerden biri bolıp, onda milliy tatıwlıq hám diniy keńpeyillik siyasatı mámleket dárejesinde alıp barıladı. Hár bir millet wákiliniń óz ana tilinde sóylewi, bilim alıwı, mádeniyatın rawajlandırıwı ushın barlıq imkaniyatlar menen sharayatlar jaratıp berilgen.
Respublikamız boylap jumıs alıp barıp atırǵan júzlegen milliy mádeniy oraylar, milliy teatrlar, dóretiwshilik birlespeler áne usınday imkaniyatlardıń ayqın dáliyli bolıp esaplanadı. Festival sheńberinde milliy lipaslar kórgizbesi, saxnalıq shıǵıwlar hám koncert baǵdarlamaları jıynalǵanlar názerine usınıldı. Hár bir shıǵıw, hár bir qosıq, xalıq ayaq oyınları jıynalǵanlarǵa ózgeshe zawıq baǵıshladı.
-Mámleketimizdi rawajlandırıwdıń tiykarı – bul turaqlılıq, tınıshlıq hám xalıqlar arasındaǵı doslıq bolıp esaplanadı. Mine, bul doslıq kórinisler búgin universitetimizde bolıp ótken festivalda óz kórinisin taptı. Álbette bul doslıq qatnasıqlar mámleketimizdiń keleshegin belgilep, elimizdiń rawajlanıwına tiykar jaratadı,-deydi qaraqalpaq filologiyası hám jurnalistika fakultetiniń 3-studenti I.Utewliev.
Festivalda student -jaslar belsene qatnasıp, olar ózleriniń ataqarıp shıqqan saxnalıq kórinislerinde doslıq, tınıshlıq, awızbirshilik sıyaqlı iygilikli ideyalardı úgit-násiyatlap, elimizdiń rawajlanıwına xızmet etiwge tayar ekenliklerin kórsetti. Álbette, bunday ilajlar tek ǵana jaslardıń qálbinde milletleraralıq tatıwlıq, watansúyiwshilik hám adamgershilik sezimlerin bekkemlep qoymastan, al Ózbekstannıń xalıqaralıq maydandaǵı abırayınıń artıwına da tiykar jaratadı.

Qaraqalpaqstan xabar agentligi