Taqıyatas rayonında házirgi kúnde 360 tan aslam kishi hám orta isbilermenlik subektleri jumıs alıp barmaqta. Kishi hám orta biznes hár qanday mámlekettiń ekonomikalıq rawajlanıwında áhmiyetli orın iyeleydi. Búgingi kúnde elimizde ekonomika kóleminiń yarımınan kóbisi, sanaat hám eksporttıń úshten bir bólegi usı kishi hám orta biznes wákilleriniń úlesine tuwra kelmekte.

Bul baǵdarda jumıs alıp barıp atırǵan isbilermenlerdiń qatarın jáne de keńeytiw, óz potencialın tolıq iske qosıwı ushın zárúr sharayatlardı jaratıw maqsetinde respublikamız boylap kishi hám orta biznes wákilleriniń qatnasıwında ashıq sáwbetlesiwler ótkerilmekte.
Qaraqalpaqstan Respublikası Salıq basqarmasınıń baslıǵı Xalmurza Bekchanov taqıyataslı isbilermenler menen ushırasıwında da jeke menshik sektor wákillerine berilip atırǵan imkaniyatlar, bar mashqalalar haqqında pikir alıstı.
Qatnasıwshılarǵa Ózbekstan Respublikası Prezidentiniń “Kishi hám orta biznestiń ekonomikadaǵı ornın arttırıw ilajları haqqında”ǵı pármanına muwapıq berilip atırǵan imkaniyatlar haqqında tolıq maǵlıwmatlar berildi.
Sonday-aq, isbilermenlerdiń salıq jeńilliklerinen paydalanıwı, salıq esabatları, hákimshilik huqıqbuzarlıq, kredit hám salıq stavkaları menen baylanıslı mashqala hám usınısları tıńlanıp, unamlı sheshiw ilajları kórildi.
Qatnasıwshılardıń pikir-usınısları da tıńlanıp, olar ózlerin qızıqtırǵan sorawlarǵa juwap aldı.

Qaraqalpaqstan xabar agentligi