Aldın xabar berilgenindey, bajıxana juwapkerleri tárepinen obektlerge ornatılǵan quyash panellerin úyreniw jumısları dawam etpekte.

Qaraqalpaqstan Respublikası Bajıxana basqarmasında quyash panellerin ornatıw jumısların muwapıqlastırıw boyınsha dúzilgen jumısshı topardıń úyreniwleri Taqıyatas rayonında dawam etti.
Rayon turǵını M.Sadullaeva shańaraǵına jaqında 5 kVt. quwatlılıqtaǵı quyash panellerin ornatqan. Shańaraǵınıń elektr energiyasına bolǵan talabı ortasha 350-400 kVt.tı quraytuǵın bul shańaraq, endi, ayına óz mútájliginen artqan elektr energiyasın mámleketke satıw arqalı ortasha 6 million sum muǵdarında jıllıq qosımsha dáramat kóriwdi de rejelestirmekte.
Rayondaǵı Aitovlar shańaraǵı da 5 kVt. quwatlılıqtaǵı alternativ energiya dereklerin qurıw arqalı óz talabın tolıq qaplap (200 kVt), dáslepki esap-sanaqlarǵa bola, jılına tutınıwdan artqan 9,6 MVt. energiyanı tarmaqqa jetkerip beriw imkaniyatına da iye eken.
Alternativ energiya derekleri mámleketimizde energiya jetispewshiliginiń aldın alıp, sanaat hám óndiristiń jáne de rawajlanıwına unamlı tásir kórsetedi.

Qaraqalpaqstan xabar agentligi