Prezident Shavkat Mirziyoev «WBM Romitex» klasteriniń Ándijan qalasında qurılǵan jańa kárxanasınıń jumısı menen tanıstı.

«WBM Fabrics» dep atalǵan bul kárxana qayta islew shınjırınıń gezektegi basqıshı. Ulıwma bahası 50 million dollarlıq investiciyalıq joybar sheńberinde zamanagóy sanaat imaratı qurılıp, Italiya hám Germaniyadan joqarı texnologiyalıq úskeneler keltirip ornatıldı. Gezlemeni boyaw hám gúl salıw jolǵa qoyıldı. Kárxana jılına 24 mıń tonna usınday ótimli ónim tayarlaw quwatlılıǵına iye. Joybar sheńberinde 600 turaqlı jumıs ornı jaratıldı.
Jáne bir itibarlı tárepi, komplekste Italiyadan alıp kelingen zamanagóy suw tazalaw imaratı qurılǵan. Onda boyaw cexınan shıqqan texnikalıq suw tazalanıp, qayta paydalanıwǵa qaratıladı. Bul únemlilik hám ekologiyalıq turaqlılıqtı támiyinlewde áhmiyetli orın iyeleydi.
Mámleketimiz basshısı kárxanadaǵı jumıs procesin kózden ótkerdi, qánigeler menen sóylesti. Óndiris maydanlarınan nátiyjeli paydalanıw, energiya únemlew arqalı ózine túser bahanı azaytıw, jumısshılardıń kásiplik mamanlıǵın arttırıw máseleleri haqqında sóz boldı.
Kárxananıń jumısı sırtqı bazarǵa qánigelesken, jıllıq eksport kólemi 55 million dollardı quraytuǵının atap ótiw kerek.
Ándijan wálayatında toqımashılıq sanaatı jedel rawajlanbaqta. Aymaqta jetistirilgen paxtanı zamanagóy klaster sistemasında tereń qayta islew keńeyip atır. Wálayattıń respublika toqımashılıq sanaatındaǵı úlesi 16,5 procent. 2024-jılı Ándijanda 20 trillion sumlıq toqımashılıq ónimleri islep shıǵarılıp, 488 million dollarlıq eksport etilgen. Bul wálayat ulıwma eksportınıń 42 procentin quraydı.