Ózbekstan Respublikası Prezidenti Shavkat Mirziyoev aymaqlardıń rawajlanıwı, xalıqtıń turmısı menen jaqınnan tanısıw maqsetinde 15-aprel kúni Ándijan wálayatına keldi.
Aymaqlardaǵı ózgerisler «hawa dárwazası»nan-aq kózge taslanadı. Mámleketimizde transport sistemasın rawajlandırıw baǵdarındaǵı jumıslar sheńberinde Ándijan xalıqaralıq aeroportı da modernizaciyalanbaqta.
Sapar waqtında mámleketimiz basshısına usı haqqında málimleme berildi.
Bul aeroport 1978-jılı qurılǵan bolıp, házirgi talaplarǵa sáykes kelmey qalǵan edi. Ushıw-qonıw jolınıń júk kóteriw qábiletiniń tómenligi, zamanagóy jaqtılandırıw sistemasınıń joqlıǵı sebepli qatnawlardı qabıllaw imkaniyatları sheklengen edi.
Házirgi kúnde rekonstrukciya jumıslarınıń birinshi basqıshı pitkerildi. Uzınlıǵı 3 mıń 300 metr, keńligi 60 metr bolǵan jańa ushıw-qonıw jolı, júriw jolı hám samolyotlar toqtaw ornı qurıldı. Drenaj sisteması jańalanıp, jer astı suwı qashırıldı. Sonday-aq, bul jerde ekinshi júriw jolınıń qurılısı dawam ettirilip, IKAO CAT-II kategoriyasındaǵı radar, meteorologiya hám jaqtılandırıw úskenelerin ornatıw jumısları alıp barılmaqta.
Nátiyjede Boeing, Airbus markasındaǵı iri samolyotlardı da, qolaysız hawa rayı sharayatı hám túngi waqıtlarda da qabıllaw múmkin boladı. Bul kúnlik párwazlar sanın 10 esege shekem arttırıw imkaniyatın beredi.
Endi, ekinshi basqıshta jolawshı terminalın jańadan qurıw názerde tutılǵan. Bul arqalı jolawshılarǵa xızmet kórsetiw quwatlıǵı saatına aldınǵı 300 den 1000ǵa, párwazlar sanı jılına 584ten 3 mıń 700ge artadı. Bul Ándijan hám Ferǵana oypatlıǵına qatnawlar sanın kóbeytiwge xızmet etedi.
Jumısın qayta baslaǵan bul aeroportta házirgi kúnde Tashkent – Ándijan – Tashkent jónelisi boyınsha párwazlar ámelge asırılmaqta.
Mámleketimiz basshısı bul jerde nátiyjeli basqarıwdı jolǵa qoyıw, xızmetlerdi arzan etip, jergilikli hám xalıqaralıq párwazlardı kóbeytiw boyınsha kórsetpeler berdi.
Ulıwma, mámleketimizde aeroportlardı modernizaciyalaw boyınsha úlken jumıslar ámelge asırılmaqta. Ótken jılları Samarqand, Termiz, Úrgensh, Shahrisabz, Moynaq, Qoqand hám Zomin aeroportları jańalandı. Jáne bir qatar wálayatlarda modernizaciya processleri dawam etpekte.
ÓzA