Báseki komiteti Ankara –Tashkent reysi menen ushqan Túrkiya puqarası hám «Uzbekistan Airways» aviakompaniyası arasında kelip shıqqan kelispewshilik boyınsha qarar qabıl etildi.

Oǵan bola, Túrkiya puqarası Komitetke múrájat etip, aviakompaniyanıń Ankara- Tashkent reysinde jolawshınıń densawlıǵı ushın áhmiyetli bolǵan arnawlı (glyutensiz) awqat jetkerip bermegenligin bildirgen. Jolawshı bilet satıp alıw waqtında óziniń densawlıǵı menen baylanıslı jaǵdaydı aldınnan avikompaniya menen kelisip alǵan hám aviakompaniya usı arnawlı awqat reyste támiyinleniwin kepilleytuǵın bolǵan. Biraq, párwaz kúni bul talap orınlanbaǵan.
Bunnan tısqarı, múrájatta samolyot salonınıń sanitariya-gigiena jaǵdayı talapqa juwap bermegeni, jolawshı otırǵan orında aldınǵı reysten qalǵan shıǵındılar bar ekenligi de kórsetip ótilgen.
Komitet tárepinen «Uzbekistan Airways» AJ aviakompaniyasına jiberilgen soraw boyınsha ótkerilgen xızmet tekseriwi nátiyjesinde jolawshı haq ekenligi, arnawlı awqattı Ankara aeroportındaǵı keytering xızmeti tárepinen jetkerip berilmegenligi tastıyıqlandı.
Nátiyjede, jolawshıǵa jetkerilgen mánawiy hám materiallıq zıyandı qaplaw maqsetinde aviakompaniya tárepinen tutınıwshınıń keyingi reysinde xızmet kórsetiw klasın biznes-klassqa arttırıw haqqındaǵı qarar qabıl etildi hám paydalı qorǵalıwı támiyinlendi.
Sonıń menen birge, samolyot salonındaǵı sanitariya-gigiena jaǵdayı boyınsha da juwapker shólkemge qosımsha qadaǵalaw ilajları ornatılatuǵını belgilendi.

Qaraqalpaqstan xabar agentligi