Evropa – Aziya haywanat baǵları akvariumlarınıń aymaqlıq associaciyası (EARAZA)nıń Evroaziyadaǵı eń siyrek ushırasatuǵın osyotr balıqların saqlaw baǵdarlamasınıń kuratorı Aleksey CHernyak Samarqand mámleketlik veterinariya medicinası, sharwashılıq hám biotexnologiyalar universitetiniń Nókis fiialına keldi.

Saparda miyman filial basshıları menen balıqshılıq tarmaǵın jáne de rawajlandırıw boyınsha sóylesiwler alıp bardı. Sóylesiw waqtında balıqshılıq tarawında birgeliktegi ilimiy-ámeliy joybarlardı jolǵa qoyıw, tájiriybe almasıw hám xalıqaralıq birge islesiwdi kúsheytiw máseleleri dodalandı.
Aleksey CHernyak filial aymaǵındaǵı jasalma basseynler hám oqıw-laboratoiyalar menen jaqınnan tanıstı. Ol jerdegi ilimiy-ámeliy baza miyman tárepinen unamlı bahalandı. Ásirese, zooinjeneriya baǵdarında oqıp atırǵan student-jaslar ushın bunday ushırasıw úlken áhmiyetke iye. Olar teoriyalıq bilimlerdi ámeliyat penen bekkemlew, siyrek ushırasatuǵın balıq túrlerin saqlaw hám kóbeytiw boyınsha zamanagóy tájiriybeler menen tanısıw imkaniyatına iye boldı.
Sapar dawamında, Ámiwdárya basseynine tán bolǵan úlken kurakmurın balıq túrlerin saqlaw hám kóbeytiw baǵdarında birgelikte jumıs alıp barıwǵa kelisip alındı. Sapar juwmaǵında tárepler balıqshılıq tarawında birge islesiwdi jáne de bekkemlew, ilimiy-izertlew jumısların qollap-quwatlaw hám birgeliktegi joybarlardı ámelge asırıw boyınsha óz-ara kelisimge eristi.

ÓzA