Prezident Shavkat Mirziyoev 14-aprel kúni turizm hám dóretiwshilik joybarlarınıń prezentaciyası menen tanıstı.

Usı jıl 9-aprelde bolıp ótken videoselektor májilisinde mámleketimiz basshısı elimizdiń bay tariyxı hám mádeniyatı, ájayıp tábiyatın paydalanıp, turistlerdi házirgiden 2-3 esege kóbeytiw múmkin ekenligin atap ótken edi.
Usınday gózzal orınlardan biri – Bostanlıqtaǵı «CHarvaq dárwazası» kompleksi. Prezidentimiz ótken jılı dekabrde onıń qurılısın barıp kórgen edi, jaqında joybardıń birinshi basqıshı ashıldı. Komplekste 16 kóp qabatlı jay, 3 miymanxana, sawda hám turmıslıq xızmet shaqapshaları, kafe hám restoranlar, bank ofisi, avtomobil turatuǵın orın boladı. Imaratlardıń tóbesine quyash panelleri ornatıladı.
Prezentaciyada komplekstiń keyingi basqıshların qurıw, turistler ushın tartımlılıǵın arttırıw baǵdarındaǵı jumıslar haqqında málimleme berildi. Onı arzan hám ekologiyalıq taza energiya menen támiyinlew ushın Shırshıq dáryasında kishi gidro elektr stanciya qurıw maqsetke muwapıq ekenligi atap ótildi.
Jáne bir joybar Tashkent qalasınıń Yashnabad rayonında okeanarium qurıwǵa qaratılǵan. Shırshıq dáryası boyında 20 gektarǵa mólsherlengen bul okeanarium turistlerdi tartatuǵın jáne bir oray boladı. Janında sawda-miymanxana kompleksi de qurılıp, olarda ulıwma 1 mıń 600 jumıs ornı ashıladı.
Sonday-aq, Yakkasaray rayonında turaq jay hám isbilermenlik orayın qurıw mólsherlengen. Onda kóp qabatlı jaylar, baqsha hám mektepler, sport hám salamatlandırıw orayları, miymanxana hám sawda ofisleri bolıwı názerde tutılǵan.
Prezidentimiz joybarlardıń huqıqıy, finanslıq tárepleri hám infrastruktura máselelerin hár tárepleme oylap, ilajlar rejesin islep shıǵıw zárúrligin atap ótti. Juwapkerlerge sapa hám múddetin anıq belgilep, orınlanıwın qadaǵalaw tapsırıldı.

ÓzA